Nongpoh, Naitung, 07: Ka Shnong Khyndewso, kaba dei kawei ka shnong ha Ri Bhoi District, ka la dawa na ka tnad PWD ba ka dei ban buh noh da ki kynja ‘Speed Breaker’, ha kawei na ka surok paidbah ha Ri Bhoi, kaba pynïasoh na ka shnong Liarbang ter ter sha Wah Umkhen bad ruh kaba pei lyngba shaduh sha Jaintia Hills, ha kaba kane ka surok ka ïaid lyngba na bun tylli ki shnong.
Kum ban pynkynmaw, dang shen ka la don ruh ka jingjia ba sngewsih, ha kaba uwei u rangbah briew na ka shnong Khyndewso, u la duh noh ïa la ka jingim, kaba dei tang na ka daw ka jingpynher sted ïa ka kali bad wat ïa katei ka Kali ba tynrah bad ïuh ïa utei u rangbah ym shym la ioh bat satia.
Kane ka surok, ka dei ruh ka surok, ba ka sorkar lyngba ka tnad PWD ka dang dep ban siang rong thymmai bad namar ka jingbha jong ka surok, kiba bun ki dribar ki shim kabu ban shu pynher sted beit ïa ki Kali, ha kaba la buh shibun ki jingma ïa ki paidbah ba ïaid ba ieng lyngba kane ka surok.
Haba kren sha ki lad pathai khubor, u Rangbah Shnong ka Shnong Khyndewso, u Bah Nicholas Malai, u la ong ba kum ka bor shnong ka la ka hap ban dawa na ka tnad PWD ban buh noh da ki ‘Speed Breaker’, namar ha shi lynter kane ka surok ki don bun tylli ki skul bad ki jaka paidbah bad bunsien tang namar ba ym don ki Speed Breaker ka la wan rah pynban ka jingjia ba sngewsihi.
U la ong ruh haooid, ka tnad PWD ka la buh da ki kynja dak ha ka surok bad bun pat na ki dribar kim sngewthuh satia ïa kitei ki dak bad ka jingpynher sted ïa ki Kali ka la buh jingma bad la jin ba ka tnad PWD ka buh da ki Speed Breaker kane kan ïarap shibun ïa ki Dirbar ba kin niah suki ïa ki Kali ha ki jaka paidbah bad ruh ban nym wan rah kano kano ka jingjia ba sngewsih ïa ki paidbah nongshong shnong.
Shuh shuh, u la ong ruh ba ka Shnong Khyndewso ka buh ïa ka jingkyrpad ïa ka tnad PWD ba ka dei ban buh noh ïa ki Speed Breaker khamtam ha u pud u sam ba hap ha ka Shnong Khyndewso, namar kum ka shnong kam kwah shuh ban dang jia ki jingjia ba sngewsih, kaba dei tang na ka daw ka jingpynher sted ïa ki kali lyngba jong katei ka surok, u la bynrap.
