Nongstoiñ, Naitung, 07: Ka District Project Management Unit jong ka West Khasi Hills ha ka sngi thong dieng jong ka taïew ba la dep, ka la pynlong ïa ka programe ba kyrpang na ka bynta ban pynshai sha ki paitbah ïa ka skhim kaba la tip kum ka CM elevate, kaba ba la mang kyrpang da ka sorkar na ka bynta ki paitbah nongshong shnong ka West Khasi Hills.
Ia katei ka prokram la pynlong ha TRYSEM hall ha ophis jong u Deputy Commi ssioner, ha kaba la donlang u bah A.R Nongkhlaw District Project Manager jong ka Basin Unit, ki nongtrei jong ka Lead Bank, u bah R.Majaw RPM, BDO Nongstoiñ C&RD Block, Kong H.Syiemlieh ADO ki la ïadonlang bad u bah H.K.Thabah ADC ka West Khasi Hills u la long u kongsan.
Ha katei ka sngi, ka jingpynshai patbah ki long halor ka jingpyntreikam jong ki nongshong shnong kiba ïoh ïa ka skhim na ka CM elevate kum ki nongri sñiang, syiar, blang, ware house, CFC bad kiwei kiwei.
Haba pynshai halor katei ka skhim, ki nongkren ki la ong ba ki don ki skhim kiba long ha ka dur ka ram, hynrei ka sut pat kaba rit bha kaba la buh ba ki nongïoh ïa katei ka skhim kin ym shem jingeh ban siew sha ki bank.
Ha kajuh ka por ki la pynshai ruh ha kaba ïadei bad ka KCC loan kaba la tip kum ka ram nongrep. La pynlong ïa ka jingïa ai jingmut bad ba ki paitbah kin pan jingshai lada don kino kino ki jingbym shai, ha kaba ïadei bad ka jingpynïaid shaphrang ïa katei ka skhim da ki nongïoh bynta.
