Bun ki samla ka jylla kim tip ba lait kam ha USTM, la pynbna beit tang haki khubor ka jylla Assam
Nongpoh, Rymphang 26: Ka Ri-Bhoi People’s Council sengkmie mynta ka sngi kala leit ban ïakynduh syndon ïa u Chancellor ka skulbah University of Science and Technology Meghalaya, namar ka jingbym ioh jingtip ki samla wad kam naka jylla kumba bun naki khubor laitkam lane ki jingpynbna la ai beit tang haki kot khubor sha ka jylla Assam katba ki samla haka jylla Meghalaya kim ioh jingtip lane bna eiei kumba la sakhi ruh bun naki kot khubor ba don ha katei ka skulbah ki dei beit tang ki kot khubor na Assam.
Naka liang ka seng kala pynsngew ruh ka jingsngewkhia hakhmat u Chancellor ka skulbah USTM halor ka jingpynlong ïaki interview thepkam haka sngi u Blei kaba dei ka sngi kyntang jong ki khristan bad bun naki samla ki hap ban leit sha ki iingmane lane ki jingïaseng bapher bapher.
Haba kren sha ki lad pathai khubor naka liang u Samla Jayson Lennox Nongrum President u la ong ba kum ka seng mynta ka sngi kala ioh ban ïakynduh bad u M Hoque Chancellor ka skulbah USTM ban aiti ruh da ka jingthoh halor ka jingsngewkhia ba bun naki samla ka jylla kim tip ba lait kam ha katei ka skulbah USTM namar baroh ki jingpynbna bad ki khubor laitkam la shaniah beit tang haki kot khubor naka jylla Assam katba ki samla wadkam naka jylla Meghalaya kim tip ne bna eiei namar bun ki nongthep kam hi ki dei beit na Assam
U la ong ruh ba kat katei ka skulbah kaba ieng hapoh ka jylla Meghalaya kala dei ban phaikhmat ruh haka iohkam ka iohjam ki samla pule naka jylla Meghalaya namar ki bun ki samla kiba la pyndep ïaki kyrdan bapher bapher kim pat ioh kam da kaba ai ruh ki jingpynbna haki kot khubor ka jylla Meghalaya ym ban shaniah tang sha Assam.
Kum ka seng kala pynpaw ruh ka jingsngewkhia kaba jur halor ka jingpynlong ïaki Interview haka sngi u Blei kaba dei ka sngi burom bad sngi kyntang jong ki khristan, hynrei ba kin pynlong pat ha kiwei kiwei ki sngi pohïa.
Shuh shuh u Samla Jayson Nongrum u la ong ruh ba kum ka seng ka sngewkhia ruh halor ka jingpyndonkam katei ka skulbah da ki jaiñ Gamosa jong ki Assamese hynrei ban pyndonkam lang ruh da ki jaiñ Ryndia bad naka liang u M Hoque Chancellor ka USTM u la kular ban shimkhia bad ban pdiang ïa katei ka jingai jingmut jong ka seng.