Nongpoh, Rymphang 26: Ka seng Ri Bhoi People’s Council ryngkat bad ka Meghalaya People’s Social Organisation kila pynbna syndon da ka jingïakhih da kaba shong kyllaiñ mungor haka 4 tarik Lber 2024 hakhmat ka Indoor Stadium kaba don ha Umlyngkdait namar ka jingpynslem jong ka sorkar ban pynmih ïaka resol jong ka District Selection Committee ha Ri Bhoi District.
Haba kren sha ki lad pathai khubor u Samla Jayson Lennox Nongrum President ka RBPC u la ong ba kum ka seng kala ïaid da ka miej jingiakren ha kaba kala leit ban ïa kynduh ïa u chairman, member secretary ka District Selection Committee ka Ri-Bhoi District hynrei i kumba katei ka jingleit kynduh kam poi shaei shaei ruh ba haduh mynta ym pat iohi ïa u soh bad ka sorkar ka shu sngap mynthi haduh mynta.
U la ong ruh ba ka DSC ka long kum ka lad iohkam ïaki samla ha kum kane ka juk hiran bad kyrduh kam, hynrei watla ki samla kila pyndep ïaki eksam bapher bapher haki snem bala leit noh hynrei haduh mynta ka sorkar kam pat lah ban pynmih ïaka resol kaba la wanrah shibun ka jingpyrkhat ïaki samla wad kam.
Dei halor katei ka nongrim ba kum ka seng kala shim ïaka sienjam ban pynlong da ki jingïakhih da kaba shong kyllaiñ mungor ryngkat ka jingkyrpad ïa baroh ki samla wadkam kiba dang ap result, ki kynhun sengbhalang ki kmie ki kpa kiba sngewkhia ïaka lawei jong ki khun ba kin mih bad snohkti lang ha katei ka sngi khnang ba ka sorkar kan sngew bad pynsngap ïaka jingdawa ban pynmih noh ïaka resol DSC kaba la dep thoh exam naduh u snem 2021-22.
