Bun ki nongkhaïi drok kiba la shah kem, ki nongdih drok la duna, kam u Conrad Sangma

Shillong, ïaïong, 08: U Myntri Rangbah ka Jylla Conrad K Sangma ha ka sngi Baar ula ong watla bun na ki nongkhaïi drok ki la shah kem ha ki Pulit bad ki briew kiba pyndonkam ïa u drok ki la nang duna hynrei u la pynpaw ba um pat hun satia ïa kane namarba ka Sorkar Jylla ka kwah ban pynlong ïa ka Meghalaya kaba laitluid na u drok.
“Ki briew kiba pyndonkam ïa u drok ki la nang duna. Ngam pat hun satia haduh katta katta. Ki dang don bun ki kam ba dang dei ban leh. Ngi kwah ban long ka jylla kaba laitluid na u drok. Ngi ïohi ïa kane kum ka thma pyrshah ïa u drok. Na kata ka daw ngi kwah ban trei tyngeh,” ong u Sangma ha ka jingïakren bad ki lad pathai khubor.
“Ngi la ïohi ba ka jingwanrah bunsien ïa u drok ka la nang kiew bad na kata ka daw bun ngut ki briew ki la shah kem bad ki Pulit ruh ki don ïa ka tnat syntiat kaba khlaiñ. Haba peit na baroh ki liang ngi ïohi ba ki kam ki la nang kham janai hynrei ka dang ka lynti ka dang jngai ban ïaid bad ki don shibun ki jingeh kiba ngi dang hap ban mad,” u la bynrap.
Da kaba pynpaw ba ka Sorkar ka la theh pisa bun bha ha ki snem baladep, u Sangma u la ong ba ka Sorkar ka la thaw ïa ka Task Force, kaba la trei borbah ban pyndkut ïa ka jingkhaïi drok.
U Myntri Rangbah u la pynsangeh noh ïa ka jingïalang jong ka Drug Reduction Elimination & Action Mission (DREAM) kaba dei ban long mynta ka sngi bad ong, “lehse, ïa ka jingïalang yn sa pynlong noh hadien ka Easter.”
“Ngin hap ban khyrwit da kaba tyngeh ïa ka jingkhaïi drok bad ïa ki nongpyndonkam drok ngin hap ban ai jingsumar bad ban ai jingïasyllok, kine ki dei kiba ngi hap ban peit mynta bad ka DREAM ka la lah ban leh ïa kine baroh,” u la ong.
Da kaba kdew ïa ka jingkhot jingwer jong u Myntri Rangbah ka Jylla Assam u Himanta Biswa Sarma ïa ki kynhun bapher bapher ban ïatreilang na ka bynta ban ïakhun pyrshah ïa u drok, u Sanga u la ong, “ka jingkhot jong u Myntri Rangbah ka Jylla Assam ka long kaba biang palat. Ngi donkam ban ïatreilang namarba ka don ka tnat syntiat kaba ju ïatreilang hapdeng ki jylla bapher bapher ïa kaba donkam ban ïatrei ryngkat bad kata kan sa jia ynda ka la don ka jingïatreilang ryngkat ha ki sngi ki ban sa wan.”
“Ha kaba nyngkong eh ka la don ka jingïatreilang kaba khlaiñ na ka Sorkar Pdeng, Sorkar Jylla bad ka thaiñ baroh kawei ban ïakhun pyrshah ïa kane ka jingisaitmet jong u drok bad nga lah ban ong ïa phi ba ka kam kaba mih nangta ka long ba bun na ki case lada phi kren halor ka jingïohkem ïa ki nongkhaïi drok ka la nang kiew,” u la ong.