Bun ki jyrwit jyrwat ha ka phiah constituency, dei ka sorkar ban rai ïa ka elekshon MDC

Shillong, Nailar 07 : Ka Khasi Hills Autonomous District Council (KHADC) mynta ka shaniah tylli beit ha ka sorkar jylla lano kan pynlong noh ïa ka elekshon MDC hadien ba ka por ba la pynjlan 6 bnai kan kut noh ha u Nailur mynta u snem.
Lah ban pynkynmaw hangne ba ka jingpynjlan da 6 bnai ïa ka samoi treikam jong ka KHADC kadei hadien ba ka Delimitation Committee kaba dei ban pynbeit thymmai ïa ki constituency kam shym la lah satia ban pyndep ïa ka kam ha ka por ba la buh.
Kumta, halor kane haba ïa kren bad u Deputy Chief Executive Member ba dei ruh u Chairman jong ka Select Committee ba dei peit ïa katei ka jingpynbeit constituency, Bah Pynshngaiñ N Syiem u la ïathuh ba kum ka Council hi ki shaniah beit ha ka rai jong ka sorkar lano kin pynlong ïa ka elekshon.
“Ka elekshon ha ka jingsngew jongnga kam shong hangi hangne ha KHADC hynrei ka shong eh ha ka sorkar jylla ryngkat u Lat. Kumta, lada ngi kloi ïa ka jingpynbeit constituency ruh namar ki don ki jyrwit jyrwat lehse ka sorkar ka lah ban ong ban ïa ap shwa ïa kane ka jingpynbeit. Hynrei lada ka sngewthuh ba donkam ban pynlong kham kloi ka lah ban phah pynlong noh,” u la ong.
U Deputy CEM u la ïathuh ruh ba ki don bun ki jyrwit jyrwat ha ka jingphiah constituency. U ong ruh ba lada ym dei ba don ki jyrwit jyrwat lehse kam don jingeh ban leit biang da kaba rim. “Hynrei namar ba don kine ki jyrwit jyrwat kumta ka shong ha ka jingstad ka sorkar bad jong u Lat.”
Katkum ka jingïathuh jong u, kine ki jyrwit jyrwat ki dei na ka jingmih jong ki paidbah ban pyrshah ïa ka jingai jingmut jong ka Delimitation Committee ban kynthup ne pynhap noh ïa ki shnong jong ki sha kiwei pat ki constituency.
U Bah Pynshngaiñ u la ai nuksa ruh ba dang shen ki la sakhi ïa ka jingpyrshah na ka Mawlai Mawroh bad kumjuh na ka Town Durbar hadien ba ka Delimitation Committee ka la ai jingmut ban pynhap noh ïa ka Mawlai Mawroh sha ka Jaïaw namar ba kane ka constituency ka don tang kumba 17,000 – 18,000 ngut ki nongthep vote.
U ong ba kum kane ka la jia ruh ha Trongpleng ha kaba ki paidbah kim ïahap bad ka jingai jingmut jong ka Delimitation Committee ban pynhap noh sha Ranikor bad kumta ki hap ban neh beit sha Mawsynram namar ka kham jan bad kham suk.
Nalorkata, u ong ruh ba ki don bun kiwei kiwei ruh ki shnong kum ha nongbah Shillong ba ka don ka jingpyrshang ban pynkynriah noh kum na Laitumkhrah sha Laban constituency bad ruh ha ki katto katne ki jaka ba ki nongshong shnong ki pyrshah bad ujor.
Hadien ba ka Dorbar Lyiur jong ka KHADC ka la thaw da ka Select Committee kaban bishar bniah biang halor katei ka kaiphod ba phah da ka Delimitation Committee, ka kynhun hapoh ka jingïalam jong u Bah Pynshngaiñ N Syiem shen kan sa kynduh noh ban ïatai sani halor katei ka mat.