Wan pynshongshit ki Shipai Liengsuiñ ka US ïa ki samla pule bad khynnah skul ha nongbah Shillong

Shillong, Nailar 07: Ka U.S. Consulate General Kolkata da ka jingsngew sarong ka la wan ialam ia ka kynhun tem jong ki Shipai Liengsuiñ jongka United States ha ka sien kaba nyngkong eh hapoh ka nongbah Shillong ha ka 6-7 tarik u Nailar.
Kane ka kynhun tem kadei kawei na ki kynhun tem ba pawnam jong ka U.S. ha ka Indo-Pacific bad ki la pynlong ïa ki jingtem jingput ha ka Martin Luther Christian University, St. Anthony’s College bad The Evening Club.
Nalor kane kila ïakynduh bad ki khynnah skul, kynthup ïa ki khynnah skul kiba duna ka bor ban ïohi jongka Bethany Society bad kiwei kiwei ki skul, ki nonghikai, ki nongtem bad ki paid nongsngap. Shuwa ba kin wan sha Shillong, kane ka kynhun tem kala leit tem ha ki jaka pule ki bapher bapher ha Kolkata bad ha Guwahati.
La tip ïa ki na ka thong kaba ki don “Partnerships through Music,” bad kane ka kynhun ka don 5 ngut ki nongtem brass kiba tbit kiba pyni ïa ka dustur ba kyrpang jong ka tem ka put ki shipai. Ki thaw ïa ki jingsngew kiba neh bad sah jingkynmaw ha ki jingïalang ba kongsan jong ka U.S. bad shabar jongka. Ka jingrwai ki jongki ki kynthup ïa ki jingrwai tynrai jong ki shipai haduh ki jingrwai kiba ïadei bad ki shuti bad ki jingrwai ba pawnam, kaba ailad ïa ki ban pynïadei bad ki nongsngap ha baroh ki rta bad ki kolshor bapher.
“Ki jingrwai ki ïaid palat ïa u pud u sam bad ka wanrah bad lum lang ïa ki briew,” la ong ka Elizabeth Lee, ka Director jong ka American Centre Kolkata, da kaba ban jur ïa ka jingdonkam jong ka jingïasam ïa ka kolshor. Ban pynskhem ïa ka kolshor bad ka jingïadei hapdeng ka ri America bad ka ri India. Kane ka jingwan ka jongki, ka long ka jingrakhe ban wanrah ïa ka jingïadei kaba ïajan hapdeng kine ki ar tylli ki ri. Ka nongbah Shillong kaba riewspah ha ka kolshor bad ka jingïeid ïaka tem ka put bad ïa ka kolshor bad ngi dap da ka jingkmen ban ïasam lang ïa ka kolshor jong ka ri America hangne lyngba kane ka kynhun tem kaba don san ngut ki dkhot.”
Ka United States Air Force Band of the Pacific ka ju leit tem kumba 200 sien ha ka shi snem bad ka kot sha palat 200,000 ngut ki briew. Kane ka kynhun kila leit tem ha ki ri bapher bapher, naduh ka India, Hong Kong, Vietnam, Indonesia, Singapore, Mongolia, Malaysia, Australia, New Zealand, Thailand, Taiwan, Philippines bad ha Laos. Ki ju leit ruh man ka por ha Korea bad Japan. Kane ka kynhun ka don 24 ngut ki nongtem ba tbit kiba trei pura kiba pyndep ïa baroh ar ki kam kiba ïadei bad ka imlang sahlang bad ki kam shipai ha kylleng ka thaiñ jong ka Western Pacific.Ki tiar tem ki jongki ki kynthup ïa ki kynhun rwai rock Pacific Trends bad Final Approach, ka Jazz Ensemble Pacific Showcase, ka Brass Quintet Pacific Brass bad kiwei kiwei ki kynhun tem. Nalor ki kam rwai jong ki, ki dkhot ki noh synniang ruh sha ki bynta ka kam pynïaid hapoh ka kynhun. La seng ïa kane ka kynhun ha u snem 1941 ha Eglin Field, Florida bad tang uwei u Sergent bad arngut ki Corporal, kane ka kynhun ka don ïa ka histori ha ka khana ka jong ka.
Ha ka thma bah Ba-ar, la pynshong ïa ki ha ki jaka kum ha Bora Bora, French Polynesia, Espiritu Santo, New Hebrides, Guadalcanal, Solomon Islands, Morotai, Dutch Indies, Los Negros bad Philippines. Ha kaba khatduh ïa kane ka kynhun tem la pynshong pynsah noh ha Clark Air Base ha Luzon Island ha Philippines. Ha ka snem 1988, kila leit sah noh sha ka Yokota Air Base ha Japan, da kaba bteng ïa ka kam jong ki ha ka Western Pacific. Ïa kane ka kynhun tem la pynkylla kyrteng noh sha ka United States Air Force Band jong ka Pacific-Asia ha u snem 1997.
Kane ka kynhun tem ka la pyninam ha ki jingïalang kiba kongsan kum ha ka prokram na ka bynta u Syiem Bhumibol Adulyadej jong ka Thailand, ka jingplie paidbah ïa ka Tokyo Disneyland, ka Sapporo International Snow & Ice Festival, ka jingrakhe ïa ka jingdap spah snem jong ka jingïadei hapdeng ka Korea bad America, ka Asian Aerospace Airshow ha Singapore , ka jingrakhe VP 50 bad 60 snem ha Townsville, Australia, ka International Marching Festival ha Tokyo Budokan bad ka Aloha Days ha Honolulu, Hawaii. Ha u snem 2005, kila leit ruh sha Thailand kum ki nongmihkhmat ha ka liang ka rwai bad ka tem ka put, ka jingpynpaw ïa ka jingsngewnguh ïa ka jingïarap jong ka Thailand ha ka por jong ka thma Vietnam.
Kane ka jingleit pyninam kane ka kynhun ha ki lai tylli ki nongbah ka ri India ka dei shi bynta jong ka jingthmu jong ka U.S. Consulate Kolkata ban pynkhlaiñ ïa ka jingïadei hapdeng ka ri America bad ka ri India lyngba ka jingïasam mar kylliang ha ka kolshor.