Shillong, Nailar 07 : Kum shi bynta ka jingrakhe ïa ka sngi kyrpang na bynta ki nongthaiñ jaiñ ne ka Handloom Day, ka National Institute of Fashion Technology, Shillong ka la pynlong da ka jingpyni nam ïa ki riam ki beit kiba la thaiñ bad kiba la pynwandur harukom.
Ïa kane ka jingpyni nam la shim bynta hi da ki samla pule bad ki nonghikai jong ka NIFT Shillong ha ka prokram kaba shongkun bha kaba long ha phyllaw jong katei ka jaka pule.
Katkum ka kyrwoh la ong ruh ba nalor kine, ki la don ruh sa ki prokram kiba pyni ïa ki kolshor bapher bapher kiba la pynwandur lang bad katei ka sngi kyrpang.
Ha kane ka sngi la donlang ruh ka Richa Kurkarni, IAS Assistant Commissioner, East Khasi Hills District kum ka Kongsan kumjuh ruh u Director ka NIFT, u Shankar Kumar Jha.
Ka Kongsan haba kren ha kane ka sngi ka la ong ruh ba ka jingrakhe ïa ka Handloom Day ka long kum ka lad ïa baroh ban ïa wan lang bad sakhi ia ki kam thaiñ jaiñ bad kiwei ki jait jingthaiñ.
Katba na ka liang u Director pat u la ong ba ka NIFT Shillong u ong lyngba kitei ki rukom thaiñ tynrai bad ki nongthain kiba tbit ki lah ban ai mynsiem bad pynshlur ïa kiwei pat ban bteng ban kyntiew shuh shuh ïa ka kam thaiñ jingthaiñ.
