Nongpoh, Nailar 07: Ka KSU Warmawsaw Unit hadien ba ka la ioh ka jingujor na ki paidbah kiba leit thied dawai na kawei ka dukan u bar jylla kaba don haka shnong Warmawsaw ba u la die da ki dawai ba la kut tarik na ka liang ka KSU mynta ka sngi ka la leit ban khang tala syndon ïa katei ka dukan.
Na ka liang u Samla Receive Pator, President ka KSU Warmawsaw unit u la ïathuh ba ba ka seng ka la ioh ïa ka jing ujor na ki nongleit thied dawai halor ka jingdie jong une u bar jylla ïa ki dawai kiba la kut ka por, bad mar mar na ka liang ka seng ka la leit mih sha katei ka Pharmacy ban peit bniah ïa ki dawai ba katei ka pharmacy ka die sha ki paidbah.
U la ïathuh, ha kane ka sngi ba ki leit mih sha katei ka pharmacy ka seng ka la lap shisha ba bun na ki dawai ba katei ka pharmacy ka die kidei ki ba kut ka por. Haba ka seng ka la tih bniah na utei u bar jylla uba seng ïa katei ka pharmacy la lap ba utei u bar jylla um shym la don wat tang kawei ka kot ka sla kaba pyn shisha ba u lah ban plie ïa ka pharmacy hapoh ka shnong Warmawsaw.
Kumta, na ka liang ka seng hadien ba ka la bishar bniah bha ka la shim ïa ka rai ban khang tala syndon ïa katei ka dukan pharmacy bad ban phah leit phai mardor ïa utei u bar jylla sha ki jaka ba u sah. Ka seng ka phah ruh ïa ka kyrwoh jing maham ïa kino kino ki bar jylla kiba thmu ban plie ïa ki dukan die dawai khlem ki kot ki sla kiba biang ka seng kan leh daka ba tyngeh ïa ki nangne shakhmat.
