Ki jinglong jingman ka synshar khadar ha kine ki khyndiat sngi ha Bangladesh kam long satia kaba itynnad namar ka jingïakhih u paidbhur kaba la itriem shisha. Kumjuh ruh ka la jia ha Srilanka namar ka jinghiar ka ïoh ka kot. Hadien bun bnai ka jingïakhih ki paidbah jong katei ka ri kum ka dak ba ki pynpaw ïa ka jingbymhun ïa ka jinglehmynthi jong ki nongïalam jong katei ka ri namar ka jinghiar ha ka kamai kajih, ka ïoh ka kot ha ka snem 2022, suki suki ka ding ka la nangpur kat haduh ba u Rabinda Rajapaksa, Prime Minsiter uba long ruh u para jong u President jong katei ka ri, u la hap ban hiar shuki noh ha u bnai May jong katei ka snem.
Hynrei, ka drama jingpynkhyllem kam pat kut tang katta, tang khyndiat por hadien jong kata, ki paidbah ki la pynbor sa ïa u Gotabaya Rajapaksa President ban phet krat na la ka jong ka ri ha ka 13 July 2022 namar ym tang ba ka hiar ka ïoh ka kot hynrei ki ram ba pan kylliang na kiwei pat ki ri ka la kiew haduh ñiuhmat, kat haduh ba ka dor ka mur jong ki marbam mardih bad ka umphniang ka la kiew shaba palat pud. Don bun ki daw balei ka hiar ka ïoh ka kot kat haduh ba ka sorkar ka la hap ban treikam da ka Emergency. Kaba nyngkong ka dei ka jingbamsap (corruption), ka peisa ka tuid tang sha ki heh ki haiñ kiba don ha ka bor, kaba ar ka dei ka Lockdown naduh 2020 haduh 2021 ha ka pyrthei shityllup namar ka jingpang khlam Covid-19, nangta ka jinglut jingsep ha ka Thma pyrshah LTTE ha ka snem 2009 bad bud sa ka jingshah pynbthei bom ki lehnoh ha ka Easter Sunday ha ka snem 2019 bad kiwei pat.
Nangta, haba phai pat sha ka ri Bangladesh, ym lah ban len ha ki 15 tylli ki snem ba ka Sheikh Hasina ka bat ïa u Lakam ha ka kti, ka lah ban khyllie pat ïa katei ka ri na ka jingduk tasam sha ka ri kaba kham pdeng ha ka economy. Hynrei kaei pat kaba pynbitar ïa ki paidbah ka long ba la tyngkai ïa ka bhahkam (job reservation) haduh 30% ïa ki khun ki kti jong ki shipai ka jingïakhih laitluid jong ka snem 1971. Hynrei wat la ka Supreme Court jong katei ka ri ka la hukum ban tyngkai 93% ïa ki samla ba pass bha ha ki interview bad tang 5% ïa kiba haïing hasem jong kitei ki shipai ïakhun thma jinglait luid, kata kam shym la pynthynda satia ïa ka ding ba klang, pynban ka la nangpur. To ngin ïapeit:
Ki paidbah ka ri Bangladesh kim hun satia ïa ka jingkiew jong ka Hasina ha ka bor, namar ki kynnoh ba la shu rigged (lehtuh) ne ïa ki ballot box ha ka por election kaba danglong shen ha u January jong kane ka snem, khlem da ailad ïa ka main Opposition party, Bangladesh National Party (BNP) ba la khlieh da ka Prime Minister barim, ka Begum Khalida Zia.
Kaba pynlehraiñ eh ka long ym tang ba ki nongsynshar jong kitei ki ri ki hap ban phet-ïap sha kiwei pat ki ri ban pyllait im ïalade hynrei ki paidbah ki la kiew bad khynra bad lute syndon haduh kamra shet kamra thiah jong ki nongsynshar jong kitei ki artylli ki ri.
Lada ka jingïakhih tang na ka bynta ka mat thungkam thungjam, ka la dei shisha ban kut noh hynrei balei pat thmu ban shim ïa ka jingim jong katei ka Prime Minister ?. Kat kum ki tyllong khubor bathikna jong ka Hindustan Times 06.08.24, la ong ba ki don ki bor na shabar ri jong ka Bangladesh ba bei tyngka bad aibuit aibor ïa ki samla pule jong ka Jamaat-e-Islami (JeI) ban kyndang ïa ka sorkar Awami League. La kynnoh ba ka ISI jong ka Pakistan ryngkat bad ka China lyngba ka “Operation Regime Change” ki la trei tyngeh lyngba u nongïalam ka Liang pyrshah BNP u Tarique Rahman ban pynurlong lyngba ka meeting basop sop ha London, ïa kaba ki heh sorkar ka Bangladesh ruh ki kubur. La ong ba ka China ka bei tyngka lyngba ki Company jong ka kiba don ha Pakistan ban pynisih India ruh ha ki samla katei ka ri.Kaba lyngngoh ka long tang khyndiat kynta hadien ba ka Sheik Hasina ka la phet iap na ka ri la jong,ki bor synshar shipai ki la hukum ban pyllait phatok noh ïa ka Begum Khalida Zia, kaba la shong byndi namar ki kam bamsap. Ka don ruh ka tyllong khubor kaba batai ba ka don ka jingsuba shaphang ka lad ban ïateh lok hapdeng ka BNP bad katei ka seng student (JeI) jong ka Islamia Chhatra Shibir (ICS). Kaba i jah burom eh dei ka jingpynkyllon bad pynpra (vandalized) ïa u statue jong u Sheikh Mujibur Rahman u kpa jong katei ka Ri kumba pynkyllon ïa u statue jong u Saddam Hussein.Ym tang katta, ki riewthrangsnam ki la pynïap klep ïa 26 ngut kiba haïing hasem jong ka Awami League, nalor ba ki lute sa ïa ka Embassy jong ka USA bad
Australia. Te haba phai sha ki kam pyrshah India ha Bangladesh, ha kaba ki nongïakhih ki pynjot pynpra ïa ki Hindu bad wat ïa ki Khasi ruh ha kaba ki la pynpra syndon phom wat ïa u Mot sahkynmaw jong u Tirot Sing uba dang shu dep plie dangshen ha Dhaka. Shano kane kan lam ? Hooid ki shipai ki la thung ïa u Muhammad Yunus (Economist) kum u Interim Prime Minister hynrei katno eh u lah ban pynïasuk ïa ka Ri jong u haba u la long pyrshah lypa ïa ka party jong ka Sheikh Hasina, Awami League.
Kaei ka jinghikai ba ngi ïoh na ka jingjia ha kitei ki artylli ki ri ba marjan bad ka India ka long, ba ki nongïalam ba la jied da ki paidbah kim dei ban shim ïa ka bor kum ka nongkynti jong ki kmie ki kpa tymmen jong ki. U paidbah u dei u nongbishar bastad, tangba lada ym phikir bha, jot noh namar ba don ki riewsianti jong kiwei pat ki ri kiba shim kabu bad ban pyrsat pynrhemïa ka jingïakhih.Wat u Prime Minister Narendra Modi ruh u dei ban phikir bha, namar ka
jingsngewsarong kum ha kane ka sansnem ba la dep bym kheiñ snep ïa ki Opposition Party bad ban pynlongkam beit tang ka mon lade da kaba ïuhroit ïa ka hok jong ki ritpaid, kane ruh ka don la ka kylla. Ka jingpynjari Curfew ha ki thaiñ khappud jong ka Meghalaya ka lah ban ïarapkhyndiat na ka jingwantuid ki poiwir na katei ka ri ba marjan. Hynrei kaei kaba donkam ka long ba ka sorkar kaba shongshuki mynta ka dei ban don ki atiar (mechanism) kiba nep bad kiba larkam ym ban shu kyndit ruma dierpor.
