Kochi, Risaw 29 : Mynta ka Sngi U Blei ha ka por 9.40 baje mynstep katba dang ïaid ka jingïaseng ha ka ïingmane Jehovah Witnesses Church kaba don ha Kalamassery, Kerela, ka la jia ka jingbthei bom IED hapoh kane ka ïing mane kaba la wanrah ka jingiap ïa arngut ki mynsiem briew bad pynmynsaw ïa bun ngut ki riewngeit jong kane ka Balang.
Kat kum ki khubor, kane ka jingbthei bom kala jia hapdeng jong ka jingïaseng Duwai jong ki riewngeit kiba don kumba 2500 ngut eiei.
Kat kum ki khubor ba mih ha ki National Media, la ong ba kane ka jingjia kala jia ruh tang hadien shisngi ba u Nongialam barim ki Hamas Khaled Mashal, ula ai jingkren lyngba ki kor online ha ka jingïalang ha Maluppuram, North Kerela ha kaba ula bhah ïa ki kynhun Jaimait-e-Islami ba kin leh eiei pyrshah ki briew ki bym ngeit Muslim.
Ka Sorkar ka la phah ia ka kynhun bor pahara ba ïakhun kam lehnoh bad ka National Security Guard (NSG) sha kane ka ïingmane ban pynlong ïa ka jingtohkit.
La iathuh ba ha kane ka jingbthei bom, ar ngut ki Longkmie ki la iap bad 23 ngut kiwei pat kila mynsaw.
Kat kum ka jingshem na ka jingtohkit ba malu mala la ong ba une u bom ba bthei um dei satia uba khlaiñ bor. Ki kynhun tohkit ki la pynthitna ba une u bom u dei uba shu buh da ka por namar ka jingbym don dak satia ban don ki battery ne ki wire na kane ka jaka.
La suba jur ba kane ka kam pyntriem ka dei ka kam jong ki lehnoh Muslim namar ki kam pyntriem jong kine ki lehnoh kynthup ka PFI ha ki snem bala leit noh ha ka thaiñ Kalamassery.
Halor kane ka jingjia, u Myntri Rangbah ka Kerela Pinarayi Vijayan ula ong “Ka dei ka jingjia kaba sngewsih. Ngi dang lum ïa ki jingtip halor kane ka jingjia. Baroh ki heh Sorkar ki la don ha Ernakulan bad u DGP ruh ula leit sha kane ka jaka. Ngi la shim khia bha ïa kane ka jingjia. Ka jingtohkit ka la ïaid shakhmat ban lap ïa ki briew ba donkti”.
