Pynbna ka KSU ïa ka lyngkhuh sngi ïap i meiieit Spelity Langrin kum ka Anti-Uranium Day

Mawkyrwat, Risaw, 29: Ka Khasi Student’s Union (KSU) South West Khasi Hills District ka la pynbna kum ka Anti Uranium Day ha ka jingrakhe ïa ka lyngkhuh sngi ïap jong i Meiieid Spelity Lyngdoh Langrin iba la kyntait ïa ka song pisa kaba T. 45 klur ba la tyrwa da ka Uranium Corporation of India Limited (UCIL).
Ha ka jingrakhe ïa ka lyngkhuh sngi ïap kaba lai jong i Meiieid Spelity Lyngdoh Langrin ha ka sngi Saitjaiñ, ki dkhot ka seng ki la teh da ki Banner ha ïew Mawkyrwat bad ki la leit ban buh syntiew ha u lum jingtep jong i ha ka shnong Domïasiat, South West Khasi Hills District ryngkat ka jingsynran lang jong ki khun bad ki ksiew jong i Meiieid Spility.
Mynba i Meiieid Spelity Lyngdoh Langrin i dang im ha sla pyrthei, i la kyntait ïa ka jingtyrwa jong ka UCIL ïa ka song pisa kaba T. 45 klur ban khlong noh ïa u marpoh khyndew Uranium ha ka shnong Nongbah Jynrin.
“Ka pisa kan ym lah ban thied ïa ka jinglaitluid jong nga,” la kren i Meieid Spelity Lyngdoh Langrin haba kyntait ïa ki sbai rupa.
Shwa ban buh syntiew ha u lum jingtep, ka seng ka la pynlong ïa ka jingduwai bad ka jingïalang kaba lyngkot bad ka KSU ka la pynkynmaw ruh sha ki paidbah ka Bri u Hynñiewtrep ba ïa ka 28 tarik u Risaw la pynbna kum ka sngi pyrshah Uranium (Anti Uranium Day).
Ka seng ka la ai mynsiem ruh ïa ki samla ba kin shim bad bud ïa ka nuksa jong i Meiieid Spelity Lyngdoh Langrin ban ïeng ha ka nongrim kaba skhem khnang ba ka seng kan jop ïa ki jingïaleh na ka bynta jong ka ri bad ka jaidbynriew bad kumjuh ruh ka seng ka la ai mynsiem ïa ki bahaïing hasem, ïa ki khun ki kti jong i Meiieid Spelity ba kin bud ïa ki dien ‘jat jong i da kaba ïeng ha ka nongrim kaba skhem ban pyrshah ïa ki jingthmu jong ka Sorkar India kaba dang ap kmang ban ban khlong ïa u marpoh khyndew Uranium.
U Bah Forwardman Nongrem haba kren sha ki lad pathai khubor u la ong ba ka jingteh ïa ki Banner ka long kum ka dak ka jingrakhe ïa ka jingdap lai snem ka jingkhlad noh i meiieid Spility Lyngdoh Langrin kawei na ki riewkhraw jong ka jaidbynriew iba la ïeng pyrshah ïa ka Sorkar India ban tih ïa u Uranium naduh ki snem 1990 haduh ki sngi jing ïap ka jong i.
“Kum ka dak ban kynmaw burom ne pyni bad pynsngew ïa ka jingpyrshah ïa ka jingtih ïa u marpoh khyndew ne kino kino kiba ïadei bad u Uranium, ka KSU ka la pynlong ka jingteh ne wah ïa ki banner ha kylleng ki jaka jong ka South West Khasi Hills District kum ha ïew Mawkyrwat bad ki don ruh kiba leit haduh Domïasiat”, ïathuh u bah Nongrem.
U la ong ruh ba watla i Meiieid Spility i la khladnoh na kane ka pyrthei, hynrei ka KSU haduh mynta ka dang ïeng ha ka nongrim ban pyrshah beit ïa kino kino ki jingthmu jong ka Sorkar ban tih ïa u Uranium.
“Hooid! watla ka kam ban ïakren ïa u Uranium ka la kham kynjah mynta hynrei kumba ka paw pat ba ka Sorkar India ka dang don hapdeng ki jingïakhun ban thaw ki lad ki lynti ban ïoh ban khlong ïa u Uranium uba don ha Mawthabah bad Domïasiat,” u la ong.
U la ïathuh ba ka seng ka la ïoh jingtip ba ka Bhabha Atomic Research Centre Training Schools (BARCTS), Mumbai ka la phah ïa ka notis sha ka North Eastern Hills University (NEHU), Shillong ba ki briew jong ka kin wan hapoh NEHU ha ka 20 tarik, Naiwieng, 2023 haduh 31 tarik u Kyllalyngkot, 2024 na ka bynta ban leh ïa ka Orientation Programme da kaba khot ïa ki samla ban ai jinghikai halor kumno ban ïohlad ban tih ïa u Uranium.
“Namarkata, ka KSU ka kren da kaba shai ba lada ka UCIL ne kino kino kiba kiba don bynta ban ki kam Uranium ki wan da kaba thmu ban tih ïa u Uranium ka seng hi kan ym ailad da leilei bad kan beh krad beit ïa ki bad ki hap ruh ban ïa pyrkhat kaei ka kam ba ka seng kan hap ban leh lada ki don kiba kum kita ki briew,” la maham une u nongïalam ka KSU.