Shillong, Risaw 29 : Ka ïew ïapan tiket na ka National People’s Party (NPP) na ka bynta ka elekshon MP ka ban long ha u snem ban wan ka la shongshit ne thnem bha khamtam hadien ba la mih ki khubor ba ym dei shuh tang uwei ne arngut ki kyrtong hynrei mynta lei lei la nang bun shuh shuh.
Ki tyllong khubor ba ïajan bad ka party ki ïathuh ba mynta ka sngi u National President ka Party, Conrad K Sangma ba dei ruh u Myntri Rangbah ka jylla lem bad ki katto katne ngut ki Nongïalam ka Party ki lah ban shong pyrkhat bad shim ïa ka rai la yn pdiang ne em sa ïa uwei pat u MLA barim na kawei pat ka party ban wan ïasoh sha ka NPP.
La ïathuh ba lada u National President bad kiwei ki Nongialam ka Party ki pdiang ïa utei u rangbah sha ka party, ka jingdon ki kyrtong ka la kiew mynta sha ka ar ngut bad kane hi kan wanrah ïa ka jingïa knieh tiket kaba jur bha hapdeng kitei ki kyrtong.
Watla ki thymmei khubor kim pat treh ban ïathuh ia ka kyrteng jong utei u rangbah hynrei la shu ai ksai ba udei uwei na ki nongmihkhmat uba shah rem noh ha kane ka elekshon ba dang shu dep ha u kyrtong ka NPP hi.
“Kaba sah mynta ka shong sa ha u National President bad ki nongïalam kumno ban rai la,” ong ki thymmei khubor da kaba bynrap ba na ka liang ka party ruh ka kwah ban rai kham stet haba ïadei bad kane ka bynta khnang ba kito ki kyrtong kiba shah jied kin ïoh ban pynkhreh noh na bynta ka elekshon.
Haba pyrshang ban kylli, la ïathuh ruh ba haduh mynta kam pat da don eh ka jingïakren ha ka NPP Block halor katei ka phang.
Lah ruh ban kdew hangne ba u MLA barim ka Congress na Mawsynram uba la shah rem noh pat ha ka elekshon ba la dep na ka tiket TMC u la leit ban pynïasoh noh sha ka party NPP dang shen ïa kaba la pdiang burom nyngkong da u President ka NPP Block Mawsynram bad hadien pat sa ha Shillong ha ka sngi kaba bud.
Ha kato ka por ki la mih ruh ki khubor ba utei u rangbah u la leit ban ïasoh sha ka NPP na ka bynta ban ïoh aireng ha ka elekshon MP.
