Shillong, Risaw 28: Ka Meghalaya High Court ha ka sngi Nyngkong ka la bthah ïa u Principal Secretary in-charge Urban Affairs department ban pynïakhlad la ka jong ïa ki ophis sorkar ha kaba ïadei bad ka leit ka wan ki kali bad ban thaw ka committee ban ithuh ïa ki jaka ba shong die madan ba la shah ban leh ki kam khaïi katkum ka aiñ.
“La bthah ïa u Principal Secretary, Urban Affairs Department ban pynïakhlad la ka jong ïa ki ophis sorkar ha kaba ïadei bad ka leit ka wan ki kali. Na ka bynta kiwei na kine ki jaka, u dei ban thaw ïa ka committee ba kynthuplang ïa ki bor ba dei khmih jong ka leit ka wan ki kali. Dei ban buh ïa ka por na ka bynta ka jingthaw ïa kane ka committee. Ka kam kaba hakhmat jong ka committee ka long ban ithuh ïa manla kawei pa kawei ka jaka ha kaba ïa kiba shong madan la shah da ka aiñ,” ong ka Ïingkashari ha ka hukum ba la shim bishar hadien ba la sngap ïa ka PIL.
Ka la bthah ba ka committee ka dei ban thaw ïa ka thup jong kiba shong madan kiba la ïohbor ban die ïa ki tiar ha kine ki jaka ba la ai bor.
“Kadei ruh ban pynthikna la kito kiba la ïoh bor ki dei shisha kiba shong die madan ha kine ki jaka ne ba ki la ai pateng ne kiba la phiah ïa kine ki jaka jong ki sha ki third party kiba trei ïa ka kam khlem ka licence ne ka jingïoh bor. Namar kata kine ki jaka kiba khlem pat ïoh bor ban pyndonkam na ka bynta ban die madan dei ban pynithuh da kaba shai bad pynïakhlad. Halor ka jingleit jurip bad jngoh ïa kine ki jaka, ka dei ruh ban don ka thup jong ki briew kiba shongdie madan kiba leh ïa ki kam khaïi jong ki ha ki jaka kiba khlem ïoh licence,” ong ka Ïingbishar.
“Ka kaiphod ruh kadei ban don ka jingthoh kaba bniah halor ka jingheh ka jaka ba la shong da kiba die madan bad kiba don ka jingïatakhuh bad ka leit ka wan ki kali,” la bynrap ka Ïingbishar.
Shuh shuh ka Ïingbishar ka la bthah ba ïa ka kaiphod dei ban phah ha ka 28 tarik u Rymphang, 2025.
Ka Ïingbishar ka la kdew ruh ba ka PIL ka pynpaw ïa ka jingwit ka leit ka wan ki kali, ka dheng kali bad ka jingbym don ka jaka pynïeng kali na ka daw ka jingdon bad buh ïa ki dukan madan.
“Ngi la pyrkhat ïa ka jingbatai ba la tyrwa da u K Khan, AAG, na ka daw ka jingslem ban aiti ïa ka kaiphod na ka sorkar jylla ha kaba ïadei bad ki hukum ba la pynmih mynshwa halor kane ka kam. Ngi la ailad ïa ka sorkar haduh ka 6 tarik u Kyllalyngkot, 2025 ban jubab ïa ka hukum jong ka Ïingbishar kaba 14 tarik u Jymmang, 2024,” ka la ong da kaba bynrap, “Ka jingpynshai ïa ki material data, policy, ka jingpyrkhat ban shim kam bad ka por ba la buh kidei ban don ha ka kaiphod, bad kumjuh ruh ka jingpynkhreh ïa ka kaiphod kaba khatduh.”
“Kum ka nuksa, ki don ki bynta jong ka Shillong kaba la tip kum ka European part, ïa ka leit ka wan ki kali ka bor ka shong ha ka Municipal bad ki pulit, ki pulit kidei ban bah khlieh halor ka rukom pynïaid ïa ki kali katba ka Municipal ka pynïaid ïa ka leit ka wan ki kali da kaba ai license ban leh ïa ki kam khaïi hapoh ka surok,” la ong shuh shuh ka Ïingbishar.
