Shillong, Risaw 25: Sa shi sien pat ka kynhun lehkai kriket ka Meghalaya ka la bteng ïa ka lynti ïaid khlem ka namjop ha ka lympung ïakhun jong ka Syed Mushtaq Ali Trophy 2023 T20 hadien ba ka la rem biang da 5-wicket ha ka Haryana hynne ka Sngi Balang ha Jaipur.
Ka Meghalaya ka la kynjoh tang 94 ron shuwa ban shah pynhap baroh ki wicket (all out) na ka 19.1 over hadien ba ki la shah phah tied nyngkong. Katba ka Haryana ka la pyndep tang hapoh 16.3 over ban kynjoh 96\5.
Hadien katto katne ki inning ba khlem shym la kamai ron, u player ka Meghalaya ba na shabar, u Nahul Verma u la ïarap 43 bol naki 34 bol, kiba kynthup saw tylli ki Four bad u Riboklang Hynniewta, u la lah ban ïarap da 19 ron naki 28 bol.
Ha ka inning kaba ar, la ïoh ban sakhi ïa ki nongkawangbol ka jylla kiba la ïaleh katba lah ban khanglad ïa ka Haryana hynrei ka ron kaba ka kynhun ka hap ban ïada ka duna shaba palat, bad kane ka long ka jingeh. U Rajesh Bishnoi, hadien ba khlem shym la ïoh kamai ron ha ka tied, u la lehbha pat ha ka bowling ban khur 2/13 na ki 4 over. U Chengkam Sangma (1/17 naki 2) bad u Akash Kumar Choudhary (1/18 naki 3) ki dei kiwei pat ki rangkawangbol ba seisoh bad kiba la ïoh pynhap wicket.
Ka Meghalaya kan sa pyndep ïa ka jingïakhun kaba khadduh pyrshah ïa ka Baroda lashai ka Sngi.
Hynnin ka sngi, la sakhi ruh ïa ka kynhun ki thei ka Meghalaya kiba la rem ha ka lympung Senior Women’s T20 Trophy pyrshah ïa ka Bengal da 8 wicket. Ka kynhun ka la hap ban tied nyngkong hadien ba duh ïa ka toss, bad ïohlad ban tied pyndep baroh 20 over hynrei kynjoh tang 43 ron bad hap 7 wicket, bad dei tang ka Rubi Chettri (12 ron not out) bad ka Luiza Tamang (12) kiba la kynjoh sha ka phew ron.
Ha ka bowling, dei tang ka Rebeldalis Syiemlieh (1/8 naki 1.5) bad ka Ajima Sangma (1/8 naki 2) kiba la ïoh ban khur wicket shuwa ba ka Bengal kan pyndep tang ha ka 7.5 over ban kynjoh ïa ka ron kaba la buh. Ka Meghalaya kan aireng sa ïa ka Chandigarh mynta ka sngi.
