Nongstoiñ, Jymmang 21: Ki paidbah Khasi bad Garo ki la bteng na ka por sha ka por ban pynpaw ka jingeh jong ki ban ïaid lynti ban leit sha ki iew ba kham jan ha ki shnong ba don ha East Garo Hills, namar ba la bun bun snem mynta ki la hap ban ïaid na ka surok khyndew bad ka jingkieng ba la shu shna hi tang da ki dieng.
Ki paidbah kane thaiñ ki la mad ïa shibun ki jingeh la ha ki por lyiur ne por tlang ruh, namar lada ki wan ne leit sha ki iew ha East Garo Hills kum ha iew Nengkram, Mangsang (Bamil), Rongjeng, (East Garo Hills), ki la hap ban kit bad bah da u briew ban ïaid lyngba katei ka jingkieng ba la shu shna hi da ki dieng,
Ki shnong khasi ba ju leit iew sha Garo Hills ki long kum ka Nongkabur, Nongjri, Nongumkap bad kiwei kiwei.Ki paidbah ka thaiñ ba shong markhap ki ar District kiba im jakpoh da ka rep ka riang.Hynrei da ka jingbym biang ka surok, ki la hap ban die tad dor ïa ki mar rep kong ki bad kane ka la ktah shibun ïa ka ïoh ka kot bad ka roi ka par jong ki.
Halor kane ka jingeh ki paidbah, ki rew rangbah ki la dep phah jingthoh sha u Engineer jong ka PWD (R) East Garo Hills, ban pynïasoh ïa ka surok bad jingkieng lyngba ka Nongdambur West Khasi Hills sha ka shnong Ronga Agal East Garo Hills, khnang ba ki nongshong shnong jong ki ar District kin suk ha ka leit ka wan bad ka kit ka bah.
Ka jingkylli ka long hato kane ka tnad ka la leh aiu halor kane ka jingdawa ba shongnia jong ki paidbah nongshong shnong, kaba la long da ki bun phew snem.Hato ka sorkar ka shahshkor ne em halor ka jingdawa ki paidbah khappud.
