Shillong, Risaw 05 : Ka East Khasi Hills Cricket Association (EKHCA) ka la bteng ban ai jinghikai lyngba ka coaching camp na bynta ki khynnah ïalehkai cricket kiba la shah jied ha ka por ba pynlong ïa ka jingwad khynnah donsap ha katei ka jait jingïalehkai ha kine ki bnai ba lah dep.
Ha ka sngi Balang, ka EKHCA ka la hiar sa sha Marbisu ha kaba ka la ïoh ban hikai pyntbit shuh shuh ïa kitei ki khynnah kiba la ïashim bynta shitrhem da kaba pynleit jingmut bha ïa ki jingai jinghikai.
Ka EKHCA dang shen ka la sdang ïa katei ka prokram ai jinghikai kaba kyrpang na bynta kito ki khynnah kiba la shah jied da kaba sdang na Smit ha ka 1 tarik Risaw bad ha ka 3 tarik ka la hiar sa sha Pynursla bad ha Marbisu ka la sdang ha ka 4 tarik bad 5 tarik Risaw 2022.
Ka East Khasi Hills Cricket Association (EKHCA) ka la pynlong ïa ka jingwad khynnah don sap ha ka jingïalehkai cricket kaba ka sienjam ba la shim da ka Meghalaya Cricket Association (MCA) ban nang kyntiew shuh shuh ïa ka jingïalehkai kriket hapoh ka jylla da kaba sdang ban ai jinghikai shwa naduh kiba dang rit.
