Subroto Cup : Rung ka Meghalaya sha ka quarter-final, pynliem da 6-1 ïa ka Goa
Khyrwit hat-trick u Da-o-hi-paia
Shillong, Risaw 05 : Ka St. Anthony’s Higher Secondary School kaba mihkhmat ïa ka jylla Meghalaya ha ka kyrdan U-17 ka la rung sha ka sha ka quarter-final jong ka lympung ïalehkai Subroto Cup 2022.
Ka Meghalaya ka la rung sha ka quarter-final hadien ba ka la pynliem kput da 6-1 kol pyrshah ïa ka Goa ha ka jingïalehkai na ka Pool H kaba la long hynne ka sngi Balang ha New Delhi.
Ha katei ka jingïalehkai u Da-o-hi-paia Rymbai u la khyrwit hat-trick ha katei ka jingïakhun ba khadduh na ka Pool H.
Ha katei ka jingïalehkai, u Da-o-hi-paia u thep ïa kitei ki lai kol ha ka minit ba 26, 44 bad 68 katba kiwei pat ki rangïalehkai kiba la thep kol ki kynthup ïa u Deibormame Tongper uba la thep ha ka minit ba 49, u Chibaitki Pamthied ha ka minit ba 55 bad u Mebannangkiew Thabah ha ka minit ba 61.
Ka Meghalaya ka la jop lynter baroh laisien ha katei ka lympung da kaba pynliem da 4-0 kol pyrshah ïa ka Madhya Pradesh bad ïa ka Sainik Schools.
Ka bat ruh ha ka kyrdan kaba nyngkong na ka Pool H ha kaba kan sa ïakhun pyrshah ïa ka Nagaland kaba bat kyrdan ba nyngkong na ka Pool G ha ka jingïalehkai kaban long ha ka 9 tarik Risaw (sngi U Blei).