Shillong, Nailur 13: Ka jingïakhun semi-final ha ka lympung Big FM’s Big Futsal Fest ki la jam sha kaba kut kumba la khmihlynti ha kaba la sakhi ïa ar tylli ki jingïakhun kiba itynnat.
Ha ka semi-final kaba nyngkong, ka AG Meghalaya bad ka MeECL ki la wanrah ïa ka jingïalehkai kaba i shongkun na bynta ki nongpeitkai. Baroh ar tylli ki kynhun ki la ïakhaid mar 4-4 kol ha ka por ba la buh. Kane ka jingïalehkai ka la jam sha ka penalty ha kaba ka AG Meghalaya ka la jop da 3-1 ban rung sha ka final.
Watla ka MeECL ka la shah pynkhyllem noh hynrei ka la ïoh jingïaroh ha kaba kane ka kynhun ka la wanrah ïa ka jingïalehkai kaba itynnat tad haduh kane ka sngi.
Ha ka jingïakhun kaba bud, ka MIMHANS kaba la wan ryngkat ki nongkyrshan ba shitrhem hynrei sniewbok ba kam shym la lah ban lehkai bha. Ka kynhun ka la shah pynliem noh da 10-2 kol ha ka Meghalaya Secretariat Home Guards ha kaba u Fivestar Shylla sa shi sien pat u la pynshongshit da kaba pynkhihjar haduh 5 kol na bynta ka kynhun.
Ka dei ka jingïalehkai kaba la synshar da tang ka Home Guards kaba la pynpjah ïa ka mynsiem ïakhun ka liang pyrshah, hynrei kam shym la pynsangeh ïa ka sur na ki nongkyrshan kiba wan sakhi ïa baroh ar tylli ki kynhun.
Ka jingïakhun na bynta ka namlahduh jong ka Big Futsal Fest kan long hapdeng ka kynhun ba baroh ki khmihlynti- ka AG Meghalaya bad ka kynhun ba la lamkhmat da u Fivestar Shylla – ka Meghalaya Secretariat Home Guards. Ka jingïakhun kan long ha ka por 4 baje nohphaisngi ha Thrive Sports Arena, Langkydring naduh 3 baje shaneng.
Ka Big Futsal Fest ka dei ka jingïatreilang jong ka sorkar bad ki kompeni riew shimet ban kyntiew ïa ka Futsal ha Shillong da kaba wanrah ïa ka tamasa jingïalehkai, ka jingïakhun paralok, bad ka jinglong kawei ha ka sport, baroh katba ka dang kyntiew ïa ka jingdonkam jong ka jingïalehkai na ka bynta ka bha ka miat bad ka koit ka khiah. La pynlong da ka Big FM ryngkat ka jingkyrshan na ka tnad Sports jong ka Sorkar jylla bad ka Maruti Suzuki Arena, Royal Enfield, Indian Bank, T7 News bad ka Directorate of Information & Public Relations.
