Jowai, Jymmang 27: Ka Hynñiewtrep National Youth Front (HNYF) West Jaiñtia Zone, hynne ka step jong ka 27 tarik kala beh ïa ki 22 ngut ki dkhar ne ki bar jylla kiba dei ki nongtrei surok jong ka Dhar Company. Kine ki dkhar kila wan sah ha katei ka jaka hajan ka wah Myntang jong ka shnong Modop Nartiang la kumba shi taiew ei ei.
Hadien ba ki dkhot jong ka HNYF, ki la ïoh ka jingujor na ki nongshong shnong ba ka don bad jingbun kine ki dkhar kala pynsyier ïaki paidbah ba leit lum leit wah bad kiba leit trei sha katei ka jaka ba ki don ha ruh ka Wah Myntang.
Kumta ka seng ka hiar sha katei ka jaka ban jurip ruh ïa ki kot ki sla jong kine ki bar hynrei la lap ba kine ki briew kim don ia ki kot kiba biang kum ka labour license, trading license bad kiwei, kumta ka seng kala phah pyllang ïa ki tiar ki tar jong ki ban phah mih noh ïa ki na kane ka jaka. U President ka seng u H. W. Sutong u la ong ba ka jingdon kum kine ki briew kiba wan rung sha poh ka jylla khlem da don ki kot ki sal ba biang kan buh ka jingeh ïa ki trai ri trai jylla.
