Shillong, Naitung 28 : Bun ngut bha ki MLA bad MDC barim na ki party bapher bapher kynthup ïa kito kiba la phet m mynshwa na ka Congress ki la khih khohreh mynta ban phai khmat bad phai dien biang sha ka Congress, ka party kaba don ha ka Liang Pyrshah ha Iing Dorbar Thawaiñ ka jylla hynrei kaba treilang pat bad ka NPP ban synshar ha Khasi Hills Autonomous Distrit Council (KHADC).
Ki tyllong khubor ba la ïoh lum ki ïathuh ruh ba na kitei ki MDC bad MLA barim ki la sdang ban leit ïa kynduh ïa ki nongïalam ha ki block bapher bapher kiba don ha rilum Khasi – Jaintia kum shi bynta ban pynkhreh ïalade na bynta ka elekshon MDC.
Na ka liang u Mawphor haba pyrshang ban ïa kren bad ban pyntikna na ki katto katne na kitei kiba paw kyrteng kim shym la treh satia ban kren ei ei halor ka daw kaba pynlong ïa ki ban phai khmat ne phai dien noh sha ka Congress.
“Ka dang kloi palat ban ong ei ei mynta,” ong uwei na ki MDC barim na kawei pat ka party.
Na ka liang uwei pat u MLA barim u la ong, “Ban leit ne ban ym leit pynïasoh ka shong ha ki nongkyrshan jongnga. Baroh kin sa shai hadien ba la thikna lano ka elekshon MDC kan long.”
Ki tyllong khubor ki ïathuh ruh ba don na kitei ki nongmihkhmat barim ki dei ruh kiba la ïakhun teng na ki party kiba ïalam mynta ïa ka bor synshar ha ka jylla.
Halor kane, haba ïoh pat ban ïa kren bad uwei na ki nongïalam ka Congress u bym pat kwah ban pynpaw kyrteng u la ong ba haduh mynta ki la ïoh jingtip ba ki don kum kine ki jingthmu na ki nongïalam bapher bapher jong ki party.
“Tangba haduh mynta kam pat don ka jingwan pynsngew markhmat ha ngi ki nongïalam. Lehse ka jingïakren ka dang long tang da ka ktien bad ki nongïalam ha ki Block ne ki Districk,” u la ong.
Ha kajuh ka por u la pynpaw ruh ba kum ka party ki ïeng beit ha ka nongrim ba ki kloi ban pdiang ïa kino kino ki nongïalam kiba wan ban ai ka jingïatrei lang tangba kata ka shong pat ha ka jingmynjur lang da baroh ki nongïalam shwa ban pdiang ïa ki.
Wat na ka liang u President Rangbah jong ka Congress, Bah Vincent H Pala dang shen u la ong ba kum ki nongïalam ka party ki hap ruh ban burom lang ïa ka jingsngew jong ki para nongïalam ha shwa ban pdiang ïa kino kino ki nongïalam kiba wan na kiwei ki party.
Lah ban kdew hangne ba don ki nongïalam ka Congress kiba pynpaw ba ki long kiba kloi ban pdiang ïa ki nongïalam barim ka party kiba la phet noh sha kiwei ki party ba kin wan phai biang. Hynrei hadien kane ka la mih pat ka jingpyrshah ban pdiang ïa ki katto katne ngut ki nongïalam ba kin wan phai bad pynïasoh biang sha ka party.
Kumba long mynta hi, ka Congress ha ka jylla ka don uwei u MP uba mihkhmat ïa ka Tura, u Saleng A Sangma, nangta saw ngut ki MLA ba kynthup ïa u Bah RV Lyngdoh ba dei ruh u Nongïalam ka Liang Pyrshah ha Iing Dorbar Thawain ka Jylla, nangta u Dr. Celestine Lyngdoh, Bah Charles Marngar bad Bah Gabriel Sohlang. Shwa kane, ka Congress ka don san ngut ki MLA hynrei ka la hiar noh sha ka saw ngut hadien ba u Saleng MLA ka Gambegre u la shah jied noh kum u MP ka Tura.
Ha kajuh ka por, lai ngut na kitei ki MLA ki bat ruh kum ki MDC kata u Bah RV Lyngdoh na Mylliem, Bah Charles Marngar na Mawhati bad u Bah Gabriel Sohlang na Nongstoin.
