Bat ka KSU 90 ngut ki bar jylla ba thmu leit bylla ha ki Coke Factory ha East Jaiñtia Hills

Shillong, Lber, 12: Ki dkhot jong ka Khasi Students Union (KSU) Umsning Circle ha ka nohphai sngi jong ka Sngi U Blei ka la ïoh bat haduh 90 ngut ki bar jylla kiba wan ka jylla Meghalaya da ka jingthmu ban leit trei bylla ha ki Coke Factory kiba don ha East Jaiñtia Hills District khlem ki kot ki sla kiba biang.
Ka seng ka la ong ba kine ki bar jylla ki la pynkheiñ ïa ka aiñ Inter-state Migrants Workmen (Regulations of Employment and Conditions of Service) Act 2011.
Ka jingïohbat jong ka KSU ïa kine ki bar jylla ka long hadien ka jingipher ïa ka rukom wan jong ki haduh ar tylli ki Bos kiba don ïa u number AS-01 GC 7338 bad AS-01 KC 5638.
Ka KSU kumba ka la ju phah ka kyrwoh ïa ka Sorkar Jylla bad ïa ka Sorkar Pdeng ba kin pynkhlaiñ ïa ki aiñ ban pyrkhing ïa ka jingrung kyrthep jong ki bar jylla hynrei kaba lyngngoh ka long wat hapoh Infiltration Check Gate ki nongtrei kim da pyrkhing namarba kine ki bar jylla ki la ïathuh ba ki siew tang T. 4000 hajar ban ïoh rung sha kane ka Jylla bad poi haduh Umsning.
“Ka jingïai kuman jong ka Sorkar Jylla ban pyrkhing ka pynlong ruh ïa ki District ba marjan bad ka Assam ban jur ki jinglute, ka jingtuh, ka khaïi drok bad bun ki runar kiba thmu ba pynïap ïa ki mynsiem ba luilui kiba ngi la sakhi ha kine ki sngi ki taiew ba mynta,” ong ka seng ha u kyrwoh ba la phah sha ki lad pathai khubor.
Ka KSU ka maham tyngeh ïa ki nongai bylla kiba ju mlien ban wanrah nongtrei nabar jylla khlem ki kot ki sla kiba biang namar ki dei ma ki kiba pynshlur bad pynkheiñ ïa ka Aiñ Inter-state Migrants Workmen (Regulations of Employment and Conditions of Service) Act 2011 kaba don la ki kyndon hapoh jong ka.
Hadien ka jingtohkit, ka seng ka la aiti noh sha ki Pulit jong ka Umsning ban leit pynphai biang ïa ki bar jylla sha ka jylla Assam.