Shillong, Lber 12: U MLA jong ka North Shillong u Bah Adelbert Nongrum u la pynpaw ba ka dei ka kamram jong ka sorkar jylla ban ptynkynriah noh ïa kito kiba shong ha Them Iewmawlong sha kiwei pat ki jaka.
Kane ka Them Iewmawlong kaba ki Harijan ki shong ki sah lah ban kdew ba ka dei kaba hap ha ka North Shillong Constituency.
“Ka dei ka kamram ka sorkar jylla ban pynkynriah ïa kito ki Harijan. Naduh kaba sdang ba ka sorkar ka la thung ïa kata ka High Level Committee (HLC) ba la khlieh da i bah Prestone ym shym la kynthup lang ïa nga wat la kane ka jaka ka hap ha constituency jong nga bad kane ka jingleh ka sorkar ka la dei ka jingpeit beiñ ïa nga u MLA ba mih khamt ïa kane ka constituency,” u la ong.
“Naduh kaba sdang nga la ong ba ngan ym ïapeiñ bad ka nongrim tang ban ïoh vote bad nga la leh shisha kumta ruh, nga khlem leit iuhkjat ban khroh vote ïa kiba shong ha kane ka jaka bad phi ïohi hi ïano ki vote namar nga la kren da kaba shai ba dei ban pynkynriah beit ïa kine ki briew kiba shong ha kane ka jaka,” u la bynrap.
U la ong ruh ba ka jingkhang ba ïaid kali na kane ka jaka ka la wanrah ïa ka jingdheng kali bad ka jingkhapngiah kali kaba jur ha kine ki bynta bad ong ba ka sorkar ka dei ban leh wutwut noh ïa kane ka jingpykynriah ïa kiba shong ha kane ka jaka.
“Ka sorkar ka dei ban pynkynriah ïa ito kiba dei ki nongtrei jong ka sha ki iingbasa ki nongtrei sorkar hynrei ïa kito kiba shong be-aiñ ka sorkar ka dei ban leh ïa kaba dei ban leh,” u la ong.
Lah ban kdew hangne ba na ka liang ka High Court ka la bthah ba ka sorkar ka dei ban pynkutnoh ïa kane ka mokotduma da kaba shim ïa ki sienjam ha kaba ïadei bad ka jingpynkynriah ïa ki Harijan.
Kumba long mynta ka mokotduma hapdeng ka sorkar jylla bad ka Harijan Panchayat Committee (HPC) ka dang don ha ka High Court haduh kat mynta ha kaba ka High Court ruh kam pat shym la ai ïa ka rai bishar halor kane ka jingïakhun mokotduma, lah ban kdew ba na ka liang ka sorkar ka ïakhun ban pynkynriah noh ïa ki Harijan ba sah ha kane ka jaka katba na ka liang ka HPC ka ïakhun ban pynskhem beit ïa ki ban shongduh noh ha kane ka jaka.
