Naduh 3 baje mynstep leit ïeng laiñ ki nongkynshew pisa ha Apex Bank Pynursla

Ba pdiang ka Bank tang 15 ngut shi sngi ban leh KYC

0

Pynursla, Lber, 12: Ki paidbah nongkynshew pisa ha Meghalaya Co-Operative Apex Bank, Pynursla sa shisien pat ki la mad biang ïa ka jingkordit kumba la jia ha ka por ba la pynduh ïa ki lut tyngka 500 bad 1000 namar ka jingpynmih hukum ka bank ïa baroh ki nongkynshew pisa ban leh ïa ka Know Your Customer (KYC) katba ynda ki paidbah ki la leit sha katei ka jaka bun na ki kim shym la ïoh satia ban leh namar ka jingpdiang ka bank tang khyndiat ngut eh ki ban leh ïa kane ka KYC.
Kane ka bank ha la sngi sngi ka pdiang ïa ki nongkynshew pisa ban leh tang 15 ngut wat lada da ki spah spah ngut ki paidbah ki leit ïenglaiñ ban pyndep ïa katei ka jingbthah ka bank.
Haba kren sha ki katto katne ngut ki paidbah kiba la mih na ki shnong jong ki ban wan kiew sha Pynursla ban leh ïa kane ka KYC bunsien ki ong ki hap leit phai namar ka bank kam pdiang palat ïa 15 ngut ban leh KYC ha ka shisngi bad ong ba kane ka jingleh sting ka bank ka pynjynjar hi khait ïa ki namar kim lah shuh ban sei ïa ka pisa kaba ki kynshew ha bank.
“Naduh 3 baje dang step phyrngap ngi la mih na shnong ban wan ïenglaiñ khnang ban ïoh pyndep noh ïa kane ka jingleh KYC phewse sngewsih ba ynda la palat shiteng sngi ki nongtrei bank ki pyntip ba ym lah shuh ban leh namar ki pdiang tang 15 ngut da kaba bthah ïa ngi ban wan pat ha ki sngi longtrei kiba bud. Ngi kiba wan na ki shnong kiba jngai ka la ktah shibun eh namar ban leit sha bank hap mih dang step bad hap shu reserve beit ka kali hynrei ynda poi hangne la bthah pynban ba ngin wan ha ki sngi kiba bud bad kane ka jingleh ka bank ka pynkordit hi khait ïa ngi namar ngim lah shuh ban sei pisa wat la ka dei ka jong ngi ruh,” ong u wei u rangbah.
“Ka bank khyllah aiu kane ba pdiang leh KYC tang 15 ngut shisngi bad ka ai hukum hi bad ka kyntait hi kiwei ki bank katkum ka jingïathuh kiba don account la da dei ha State Bank ne Meghalaya Rural Bank ki pdiang beit 15 ne 20 ne 30 ruh ha ka shisngi hynrei hange pat hana 15 beit bad lada dei ba ki sngewthuh ba duna nongtrei balei kim phah na Shillong ban wan ïarap shipor arpor hynrei kumba long mynta te imat ki kwah pynkordit ïa ki paidbah ba kynshew pisa namar lada ym pat leh ïa kane ka KYC ka bank kam shah shuh satia ban sei pisa,” ong kawei pat ka long kmie.
Shuh shuh haba ïakren ki don kiba ïathuh ba ki la wan ïeng laiñ haduh saw sien lynter hynrei khlem seisoh sati bad ynda la leit kyrpad ïa ki nongtrei ki kren heh pynban ki la ïathuh.
“Nga la leit ban kyrpad ba kin sngew synei hynrei la ong pynban ba lada ngam don pisa shuh panram na kiwei ne lada ym lah shah shuh pyndam noh syndon ïa ka accunt na kane ka bank leit plie sha kiwei pat ki bank,” ïathuh sngew bynñiaw uwei u rangbah.
“Kaei kaba ngi la mad ha u snem 2016 ha ka por ba pynduh ïa ki lut tyngka 500 bad 1000 ngi kiba plie account ban wan kynshew pisa hangne ha Apex Bank Pynursla ngi mad biang ha une u snem uba mynta,” ong ka sur jong ki nongkynshew pisa.

Leave A Reply

Your email address will not be published.