Shillong,Lber 12 : Ka general election ba khatwei sha ka Meghalaya Legislative Assembly kala wan bad ka la leit noh kum ka umsaw jong ka por lyiur. Ki sur ki kyrhuh bad ki kynhui ban pynshisha ba ka dei ka Tamasa ba pawnam jong ka snem 2023. Kaba sah kynmaw ka long ba ki samla ki turbha shakhmat ha kane ka election, lehse na ka daw ba ki kwah ban wanrah shisha ïa ka jingkylla ha ka synshar khadar ban pynkylla ïa ka lawei badum jong ka pali 2018- 2023 sha ka Lawei ba tyngshaiñ jong kane ka pali ba mynta. Kata, naduh ka pule puthi, ki jingïohkam ïohjam nalor ki kam sorkar bad haduh ki kam kharkhana, namar da ki spah hajar ngut kiba la nang la stad, kiba la biang ka kyrdan kim don jingkyrmen na ka daw ba u lyoh badum u kah ïa ka lawei jong ki. Kumta ki sngew bitar ïa la ka jong ka jingshem, ki rai ban tur noh sha surok ha ka por election ban pynpaw “ba ngi don hangne ban pynkylla”.
Haba ngi phai pat sha tamasa jong ki poltical party, ngi ïohi kumto, wat la ka don ka jingtreilang da ki juh ki party ha ka sorkar synrop MDA 1.0, pynban ki ïadung ïatynrah la kum ka Ukraine bad Russia. Ka UDP ka ther ïa ka NPP ba ka lehstad marwei halor ka jingpynbeit pud bad la kynnoh ruh ïa ka scheme FOCUS bad kiwei pat ban pynmyllung ïa u paidbah ba shisur shidur. Ka BJP kaba kylla khlieh khlieh tdong tdong (ban weng ynnai weng) na ka sorkar synrop jong u Conrad K Sangma, hynrei haduh ka khyllipmat Election ka don beit hajuh. Wat la katta ruh, ka dangther pyrshah ïa ka NPP ba ka dei ka seng kaba bamklop tam ha India, ym tang ki nongïalam jong ka Unit hangne hynrei wat na u Amit Shah Union Home Minister ruh u pyrshang ban pynthame paidbah da kata ka agenda. Nangta, ka pyrshang ban pynphriang khubor ruh ba u Conrad Sangma um shah ïa u Prime Minister ban ïalap election ha P.A. Sangma Stadium ha Tura namar wat la dep plie da u Chief Minister pynban ka jingtrei kam pat dep satia bad kumta ter ter. Kumjuh ruh, wat ki katto katne ki NGOs ki pyrshang ban pynsngew paidbah ïa la lyer pyrshah sorkar (anti-incumbency wave) ha kiba bun ki liang.
Hynrei kaba lyngngoh ka long, ba u Bah Prestone Tynsong uba ki khot ieit “Maduh” ha ka jaka ba un dom hynrei u shait pynbiria pynban ha kino kino ki jingïalang kum ka lad ban pynjem noh (nuetralized) ïa ka jingshnabeiñ ïa ki “memes” pyrshah ïa u da kaba shait ong haba phi shna ‘memes’ ne comment ei ei wat shna tang kaba beiñ ne pyrshah, ïaroh de teng teng ïa ki kam babha jong nga ne jong ka sorkar da kaba samrkhie artad. Nangta,haba la thnam eh ka ïalap elekshon, nalor kiwei pat ki jingkren, utei u Maduh u kren pat kum u nongïathuhlypa (political pundit) da kaba ong, (i) Lada ki kren beiñ katno katno ruh sa peit ki dei kita ki ban wan pan lyngknot ne jaka shong nyngkong na ka Bazar Bus jong NPP bad ha kata ka por ngin phah shong ïa ki sha tnum jong ka Bus bad ngim shah ban ïeng tang ha footboard ruh (ii) yn ai ïa ki tang iwei i bilor um barit ba kin nym ïap tyrkhong haba ki shongbus katba ïa ki jong ngi yn buh da ka Syntex. Kitei ki jingkren tang hadien ar bad lai taiew ki la urlong sbak. U nongthoh um da kwah ba jer hangne kiei kita, phi la ïatip hi bad haduh kaba sam slabhah ruh, phin ïohi ïa kata ka jingïathuhlypa ka la urlong, kiwei ki party ki ïoh portfolio tang ki department ki barit baria. Hooid,ngim mut ban ong ba kitei ki department kim dei kiba donkam hynrei kiba don ha ka sorkar borabor ki ïabeh ïa ki dohmet bad kiba kham donkhleiñ donkshong.
Haba phai sha kawei pat ka liang, ki kyrtong kiba shahrem te haduh mynta ruh ki dang kheiñ jingkheiñ sah, balei nga duna vote na kato ka polling station bad kaei ka daw. Katba ki katto katne ngut pat kiba shu rem salit, khlem pep kan kyrjaw mluh ïa ka jingmong jong ki da ki snem. Ym lah ban len kawei ka na ki daw, wat la ka Voice of the People Party (VPP) ka dang shu shylluid tang kumba laibnai ei ei (kata naduh 19 th Naiwieng 2022) bad kaba pynieng candidate tang 18 ngut, pynban ka jingklang ka lyer (wave) jong ka ka long kaba shyrkhei kat haduh ba ka pynking baïong ruh ïa ki katto katne ngut ki MLA,MDC. Kumba u Bah Ronie V Lyngdoh u ong, ba um poi pyrkhat ba ka jingïaleh jong u kan dei pyrshah ïa u Prah, u dangmut ka dei beit pyrshah ïa ka Kot. Nangta,ka jingmih madan jong u Bah Tarcis Mawlot na Mawlai Constituency uba ïoh votes tang 264 na ka 40,493 ka dei kawei ka khana ban sahkynmaw namar u ïaleh elekshon ym ban canvass hynrei ban ïalap gospel shaphang ka mon jong u Blei kumno ban pynim ïa ka Ri bad ka Jaidbynriew, ka long kumba leh u Ma Noren Talang mynnymwei.
Haba ngi phai pat sha ka phang jong ki social media,ka long kaba sngewlehraiñ ba phin pule ïa ki jingkynthoh pyrshah,ka beiñ ka khoh bad ka sin ka rngop lada ïa uno uno u briew ruh, tang khyndiat eh phin lap ki jingkynthoh kiba tei bad don burom. Kane ka pynpaw ïa ka jingnang hiardor jong ka imlang ka sahlang khamtam ïa ka jaidbynriew ritpaid kum ka jong ngi. Haba ïa nujor bad kito ki nongïalam jong ki jylla kiba mynshwa, kine kiba mynta te ki long jai jai shisha (cool customers) wat hapdeng ka jingklang ka ding ruh hateng hateng, ki ïai pynjem. Ka jingshahpynsmai jong u Bah Prestone Tynsong ,Bah Sñiawbhalang Dhar kum ki Deputy Chief Minister kam dei shuh kaba dang thymmai kumba long teng u Dr R.C.Laloo bad Bah Rowell Lyngdoh, hynrei ngi kyrmen ba kan ïarap ban kyntiew kham stet ïa ka ïoh ka kot bad ka roi ka par jong ka Jylla lyngba ka sorkar MDA 2.0
Khatduh eh wat la ngim tip kaei ka daw shalyndet, pynban ka jingwan sakhi lang jong u Prime Minster Narendra Modi bad u Home Minister Amit Shah ïa ka jingbamsmai jong u Canrad K Sangma bad ka kynhun myntri ha ka 7.03.2023 ka la pynlyngngoh namar ka jingwan ïalap elekshon jong ki ha ka Shillong bad ha Tura kumba la kdew haneng, ki la tangon tyngeh shisha ïa ka sorkar u Conrad Sangma. Uwei na ki MLA jong ka BJP lei hadien ba la shah sloit myntri, u la pynphriang khubor man ka por ba un nym ïatreilang shuh bad u Conrad. Te imat kumba ong u ‘Maduh Prestone’ ba ka jingkynnoh jong ki ka long ka khlem nongrim, dei na kata ka daw lehse kim sngewshongnia khlem da ïatreilang biang bad ka NPP tang ban pynsawa ïa ka sur jong ki pleng wat la ki don tang arngut ruh.
Hynrei ka MDA 1.0 ka la mad katto ïa ka jingbitar jong ki paidbah, ka MDA 2.0 ka hap ban ïaid phikir lyngba ïa ka jingphrang jong ka ding, ym shuh ban kheiñsting ïa u paidbah, ïa ki nonghikai namar kiba shong liang pyrshah ruh ki dei ki snar suda khamtam haba la rung kum ki jong u Bah Ardent Miller Basaiawmoit, Bah Charles Marngar, Ronie V Lyngdoh, u Dr Mukul Sangma bad kiwei.
Khatduh eh, kane ka elekshon ka pynsahkynmaw shisha, nalor ba don u nongïathuhlypa, u nongïalap gospel don ruh sa ka beauty pageant kiba tyrwa ba lah ban apply shithi samla ïa ki kumba ong kawei ka samla ha rynsan paidbah ha Mairang. Hynrei nalor jong kitei, kaba donkam eh ka long ka corruption free government, ban kyntiew ïa ka roi ka par bad aikam wut wut ïa ki samla ba la nang la stad ym shuh contractual, khnang ba ha ka survey jong ki national agency ka jylla kan nym poi khlem raiñ shuh sha tdong.
