Baroh ki seng saiñ pyrthei ha Meghalaya ki dei kiba ïatreilang kawei ban pynkhlaiñ ïa kawei pat ka bor ba synshar ha India: HNLC

Shillong, Nailar 14 : Ka Seng ba la shah kheiñ beaiñ ka Hynniewtrep National Liberation Council (HNLC) haba rakhe ïa ka Sngi ba Seng Nongrim ne ba la suit la shor ïa ka ba la dap mynta 39 snem da kaba ka la kynmaw burom ïa ki dkhot bad ki nongkyrshan jongka bad ther ruh ïa baroh ki Seng Sain Pyrthei hapoh Meghalaya bad ïa ka polisi jongka Sorkar India.
Ha ka kyrwoh khubor ba la pyllait da u General Secretary ka HNLC u bah Sainkupar Nongtraw u la ong “Na ka bynta jongka HNLC, nga kwah ban pynpaw ka jingsngewnguh bad sngew burom ïa baroh ki Nongïalam, ki Dkhot,ki Seng Bhalang, ki Nongkyrshan ba ieit eh bad kyrpang eh ïa ki paid ka Bri u Hynniewtrep ha kum kane ka sngi ba ngi rakhe ïa kane ka lyngkhuh snem ba 39 ba la seng nongrim ïa ka Seng”.
Kine ki 39 snem ki dei tang ki dak jingkheiñ hynrei ka ïeng ban pyni 39 snem la ïaleh, la aiti lut, len lade khlem da pynkheiñ ïa ki nongrim jongka ri bad ka Jaidbynriew, ong ka kyrwoh.
Ka Seng ka kynnoh ruh ba ha kine ki snem ka la duh ïa kiba bun ki dkhot jongka la ka dei ha ka kti ki nongshun ne da kaba shet kylla napoh ka seng hi. Kane ka dei ka jingmong kaba ym lah ban pynkoit bad kane ka dei kaba pyntlot keiñ ïa ka jaidbynriew hi baroh kawei.
Haba ther ïa ki seng saiñ pyrthei ka HNLC ka la ong baroh ki seng saiñ pyrthei ha Meghalaya la ka dei ka BJP, ka Congress, ka NPP ne ki seng riewlum kum ka UDP, VPP, HSPDP ki ïatrei lang kum kawei ka kynhun ban pynkhlaiñ bad aibor ïa kita ki bor synshar ka ri India.
Kine ki dei kiba pdiang ïa kata ka jinglaitluid jongka ri India bad kohnguh ïa ki Riti synsharjongka ban ïa kaba ki ïakhun ban ïoh ïa ka jingsynshar kaba laitluid. Kim buh jingkylli ïa ka ruh hynrei ki shut phyrnai pynban ïa ki nar jongka.
Ka kynnoh “Ka India ka kwah ïa ki jaka puta jong ngi, ïa ka spah ka phew,ïa ki lum ki wah hynrei ym dei ïa ki briew, ïa ka kolshor bad ka jingithuh tynrai ïa ngi”
Ka seng ka la kynthoh jur ruh halor ka jingpynkhreh ban wanrah ïa ka FCRA Amendment Bill da kaba ong ba ka aibor ïa ka sorkar ban mushlia sha ka jingïoh synniang ki seng bapher bapher. Ka jingkylli ka long ba ka India kam dei ban peit bad pynïaid ïa ka pisa bar ri hynrei ka jingkylli ka long balei ïa kata ka ïoh ka kot la niew kum kata ka enjin jongka jingkiew katba ki seng trei mon sngewbha pat la niew ïa ki kum kita ki nongshun ba hap ban tehlakam.
Ka la ong kat kum ki kot ba la wanrah hapoh ka Parliament ha ka 28 tarik Naitung 2026 la kdew ba ka India ka ïoh pdiang 94.84 billion dollar na ka America katba ïa kiwei ki seng pat la teh kyndon da kita ki kyndon ka FCRA.