Baroh ki paidbah mynta ki phaikhmat sha ka VPP : Kong Aibandaplin F Lyngdoh

Shillong, K’Lyngkot 29 : Ka kyrtong jong ka Voice of the Peoples Party (VPP) na Mylliem, Kong Aibandaplin F Lyngdoh ha ka sngi Balang ka la ong ba baroh ki paidbah mynta ki phai khmat sha ka party VPP ha kane ka elekshon MDC kaban sa long shen.
Ïa kane, ka Kong Aibandaplin ka la kren hadien ba ka la dep ban thep kyrteng na bynta ka elekshon MDC ryngkat ki phra ngut kiwei pat ki kyrtong jong ka party ha ISBT Mawiong.
“Kadei ka thong jongngi ban wanrah ïa ka synshar khadar kaba khuid kaba suba bad dei na kane ka daw ba ngi la mih shakhmat ban iakhun ïa kane ka elekshon,” ka la ong haba kren bad ki lad pathai khubor.
Shuh shuh ka la ong ruh ba mynta ha man la ki jaka jong ka Ri Khasi Jaintia baroh kawei ki paidbah ki la phaikhmat sha ka party da ka jingkyrmen. “Kumta ngi kyrmen haba ngi mih shakhmat khamtam haba ngi mih na ka party kaba baroh ki paidbah ki pdiang bad kumta ngim don jingartatien,” ka la bynrap biang.
Haba ïa kren pat bad u kyrtong ka party na Mawkhar – Pynthorumkhrah Bah Strongpillar Kharjana, une u kyrtong u la ong ba kumba ka long haduh mynta hi u MLA ka thaiñ u dang don lang ha ka party. “Ngim pat ïoh kano kano haba ïadei bad kane namar haduh mynta u dang don bad ngi bad un ïai sah bad ngi hi,” u la ong.
Lah ban kdew hangne ba u Bah Strongpillar u hap ban ïakhun pyrshah ïa u kyrtong ka Congress Bah Pynshngaiñ N Syiem uba dei ruh u Deputy CEM barim ka KHADC bad kumjuh ruh u Working President jong katei ka party.