Shillong, Lber 27 : Ka Executive Committee jong ka KHADC ha ka sngi Palei kala rai ban buddien bad pynbor ïa ka sorkar jylla ba kadei ban wanrah ïa ka jingpynkylla ïa ka Meghalaya Minor Mineral Concession Rules (MMMCR), 2016 khnang ba kan weng ïa ka jingeh ba kynduh da ki nongtih par kiba dang bteng ïa ka kam jong ki ha ka rukom tih tynrai.
“Nga kular ha ka Ïing ba ka EC kan sa pyrshang ban wad ki lad ki lynti kumno ban pynbor ïa ka sorkar jylla ba kan wanrah ka jingpynkylla thymmai khnang ba kane kan weng ïa ka jingeh jong ki nongtih par kiba rit bad ruh ban pyntikna ba kum kine ki jait kam tih par kam dei ban ktah pat ïa ka mariang,” ong u CEM ka KHADC, Bah Shemborlang Rynjah haba jubab halor ka motion ba wanrah da u Nongïalam ka Liang Pyrshah, Bah Titos W Chyne.
Shuh shuh u ong ruh ba ka EC kan sa phah ïa ka jingai jingmut halor kane ka bynta.
“Ka Council dang shen ka la ai jingmut ban kynthup lang ïa ka kyntien “traditional mining lane ka rukom tih par tynrai) ha ka MMMCR, 2016 kaba nga sngew ba ka long kaba donkam,” bynrap biang U CEM.
Shuh shuh u ong ruh ba u sngew ba kan kham don bun ka jingpynjot ïa ka mariang lada pyntreikam lyngba ka jingpyndonkam da ki kor ki bor kiba heh hynrei ka rukom tih par tynrai pat ka pynsuki ïa ka jingpynduh ïa ka mariang nalor ba ka long ka lad aikam ïa ki paidbah.
Katkum ka jingong jong u, katkum ka Rule, ka kamram jong ka District Council hi ka long beit tang ban ai ïa ka No Objection Certificate.
