Ban wanrah jingïatylli, pynlong ka KJSU da ka jingïakynduh lang ki samla pule Khasi ha Guwahati

Nongpoh, Naiwieng 01:Ban wan rah ïa ka jingïadei kaba jan bad ruh ban ïa peit lem ïa ka eh ka shon ki samla Khasi kiba leit ban pule ban wad ïa kata ka jingnang jingstad ha sor Guwahati ha ka jylla Assam, ka Khasi Jaiñtia Students Union, Guwahati mynta ka sngi ka la pynlong daka ka lympung ka jingïakynduh lang ki samla pule Khasi ba la tip kum ka Khasi Jantia Students Union Fresher Meet 2025 ha Shilpgram, Panjabari Road, Six Mile, Guwahati.
Kane ka jingïakynduh lang ka long kum ka jingwan rah ïa ka jingïatylli hapdeng ki samla Khasi kiba dang leit pule thymmai ha ki jaka pule bapher bapher bad ki samla kiba la pule lypa ha sor Guwhati, na ka bynta ban ïa trei lang ban peit lem ïa ka bha ka miat jong ki samla pule Khasi ha ka jylla Assam.
La wan ruh ban ai mynsiem ïa kane ka jingïakynduh lang da u MLA Mawhati u Bah Charles Marngar kum u kongsan bad u Bah Trebor Suchiang kum u symbut kongsan ha ryngkat ka jingdon lang u President ka Hills Farmers Union u Bah Comander Shangpliang, Ladapborlang Mawrie Adviser ka KJU, u Mountain Dkhar President ka Khasi Jaiñtia Students Union, Guwahati, u Samla Kaiman Sayoo General Secretary, Khasi Jaiñtia Students Union, Guwahati lem bad kiwei kiwei de.
Kane ka jingïakynduh lang ka dei ka lympung kaba la ju pynlong man la u snem ha sor bah Guwahati naduh ba la seng ïa ka Khasi Jaintia Students Union, Guwahati naduh usnem 1973 bad kane ka kynhun kan peit kyrpang tang ïa ki samla pule Khasi na ka jylla Meghalaya kiba leit ban pule ha ka jylla Assam khamtam ha sor Guwahati.
Ha kane ka sngi, na ka liang kane ka seng ryngkat ki samla pule ki la leh burom ruh ïa u (L) Dr. D.D Lapang kum ka jingburom ïa une u nongïalam uba la khlad noh na kane ka pyrthei, ha kaba ki la pynlong ruh daka jingsngapjar ba shipor ban ai burom ïa u. na ka liang kane ka kynhun ka la sam ruh ïa ki khusnam sha ki katto katne ngut ki samla kiba la shakri bad len lade ïa la ka jingim ban ai ka jingshakri kaba paka ïa ki samla Khasi bad ha kajuh ka por la pynphuh pynphieng ruh ïa kane ka lympung da ki jingrwai, ki jingshad bad ka put ka tem jong ki samla Khasi kiba pule ha ka sor Guwahati.
Haba kren ruh ha kane ka sngi kum u kongsan, u Bah Charles Marngar u la ai ka jingkhublei kaba kyrpang ïa ki nongïalam ka Khasi Jaintia Students Union, kaba la shim ïa kane ka bynta kaba khraw ban lum ban lang ïa ki samla pule Khasi ha kane ka sorbah Guwahati, namar haba don kane ka kynhun ki samla pule ki sngew shngain bad ki lah ban ruh ban wad ki lad jingïarap lada ki don ha kano kano ka jingeh haba ki dang pule ha katei ka jylla.
U la ong ruh kane ka lympung ïa kynduh lang ka long shi bynta ban wan rah ïa kata ka jingïatylli hapdeng ki samla Khasi ba ki dei ban don kata ka jingïatrei lang haba ki don ha katei ka jylla ban wad jingnang jingstad bad kum ki samla Khasi kim dei ban don ka jingïapher jingmut bad ban ïa trei lang na ka bynta ka jingbit ka jingbiang lang jong baroh ki samla pule Khasi.
Shuh shuh, u la kyntu ruh ba kum ki samla Khasi haba ki leit ban pule ki dei ban pyndep hok ïa la ka jingpule kumba la angnud ki kmie ki kpa bad kam mut ba ki don ha katei ka jylla tang ban pynlut kai ïa ka por bad lada ki don kano kano ka jingeh ki lah ban pyntip sha kane ka kynhun kaba ladon lypa ban ïa trei lang bad na ka liang jong u ruh u la ai mynsiem ba kin dang ïatrei lang lada ki donkam ha kano kano ka por ban kyntiew ïa ki samla pule Khasi kiba pule ha sorbah Guwahati, u la bynrap.