Shillong, Naiwieng 01: Ka North Eastern Indira Gandhi Regional Institute of Health and Medical Sciences (NEIGRIHMS) ka la pynkut noh ia ka Special Campaign 5.0, ka prokram kaba la neh mynta baroh shi bnai. Ha kane ka sngi pynkut la pynlong ia ki prokram bapher bapher, kynthup ia ka jingpynkhuid ia ki sawdong sawkun, ka jingpynitynnad ia ki ophis bad sawdong ka campus, bad ka jingbret noh ia ki kot kiba la rim. Ka NEIGRIHMS ka la ïatreilang ruh bad ki nongshong shnong ha ka thaiñ ban kyntiew ïa ka jingkhuid jingsuba bad ka jingpynsngewthuh ïa ka koit ka khiah, da kaba pynlong ïa ka jingpynkhuid ïa ki Rural Health Training Centre, Bhoirymbong, bad ha Mawdiangdiang police outpost.
La pynlong ia ki prokram pynsngewthuh ia ka koit ka khiah, ki jingiakop pyni poster, bad ki jingiakop pynkylla ia ki jaboh sha ki rukom bapher bapher na ka bynta ki samla pule bad ki nongtrei. La pynlong ruh ia ka jingai sumar ei khlem donkam jingsiew ei ei ha Community Hall, Nongkhyriem, ryngkat ka jingiatreilang bad ka Seng Kynthei Nongkhyriem.U Director ka NEIGRIHMS, u Prof. Nalin Mehta u la pynpaw ka jingsngewnguh ïa ki nongtrei, khamtam eh ïa ki nongtrei na ka tnad kaba peit ha ka jingpynkhuid, na ka bynta ka jingtrei shitom jong ki ban pynlong ïa kane ka prokram kaba jop. U Prof. Mehta u la ban jur ïa ka jingshimkhia jong ka NEIGRIHMS ban kyntiew ïa ka jingkhuid jingsuba bad ka jingpynsngewthuh ïa ka koit ka khiah ha ka jylla Meghalaya. Ha kane ka jinglehkmen ka la don ruh ka jingai jingithuh ia ki nongtrei ba peit ia ka khuid ka suba da ki khusnam kum ki nongtrei ba tbit tam jong u bnai bad la sam khusnam sha ki nongjop ha ka jingiakop.
