Shillong, Naiwieng, 01: Ka St. Mary’s Higher Secondary School, Rangblang, kaba dei ka skul ba la seng da ki rangbah jong ka Jingïasyllok u Don Bosco ka la long kawei na ki skul ba la pynmih ïa ki riewngeit, ki riewstad bad ki nongshakri paidbah ha South West Khasi Hills District.
Ha ka jingrakhe ïa ka lyngkhuh 50 snem jong ka skul, ki khynnah skul barim hapoh ka jingïatylli bad ka mynsiem sngewnguh ki la noh synñiang 9 lak tyngka na ka bynta ban tei ïa ka jaka leit bar kaba thymmai jong ka skul.
Ka jingai jinghikai jong ka skul ha kine ki sanphew snem ka la long ka jingmyntoi ïa ki khynnah kiba mynta ki la long ki nongtrei ha ki tnad treikam ka Sorkar bad ki nongshong shnong kiba don jingkitkhlieh ïa ka imlang ka sahlang, nalor bun na ki la shah khot ban shakri ha ka ki Lyngdoh Sohblei bad ki Riewniam. Ka skul ka la pynmih haduh 17 ngut ki Phadar bad bun ngut ki Sister, nalor kiwei pat kiba la long ki babu ha ki tnat treikam ka Sorkar bad ophisar kum ka Kong Mildred Ïawphniaw, kaba long ka Chief Post Master jong ka GPO, India.
Ha ka sngi pynkut ïa ka jubilee ha ka sngi Thohdieng, la pynbna paidbah ïa ka jingnoh synñiang hapoh da ka jingïadonlang jong u Vicar General ka Nongstoin Diocese u Rev. Fr. Anselm Nonglang, u Secretary jong ka Shillong Province u Rev. Fr. Shining G. Lyngkhoi, ki Phadar, ki Sister, ki nonghikai, ki khynnah skul ba mynta bad ki paidbah nongshong shnong.
Ar ngut ki khynnah skul barim ki la pynpaw ka jingsngewnguh bad ka jingsngew sarong ïa ka skul kaba ki ïoh ïa ki jinghikai bad kaba la pynlongbriew ïa ki. Ki la pynpaw ruh ba na kane ka skul hi la mih u Most Rev. Bishop Wilbert Marweiñ, uba long u Bishop ba mynta jong ka Nongstoin Diocese.
U Rev. Fr. Edmund Lakra, uba long u Principal jong ka skul bad u Provincial jong ka Shillong Province u Rev. Fr. John Zosiama ki la pynpaw ïa ka jingkmen halor ka mynsiem ba la noh synñiang da ki khynnah skul barim kiba la pyni ïa ka jingsngew ieit ïa ka skul kaba la ai jingmyntoi ïa ka jingim jong ki.
Ka St. Mary’s Rangblang ka la sdang kum ka Lower Primary School ha u snem 1927, la kyntiew sha ka M.E. School ha u snem 1960 sha ka Secondary School ha u snem 1975 hapoh ka jingïalam u Rev. Fr. George Vanni (bam kwai ha dwar U Blei), uba la don mynsiem ban kyntiew ïa ka jingnang jingstad jong ki khynnah rit kaba la wanrah haduh kane ka sngi ba ka skul ka la kynjoh sha ka jingïaid lynti kaba la 50 snem.
