Ban pynkiew ïa ki rukom seng kam seng jam plie u Myntri Rangbah ïa ka CM-Elevate, 70,000 ngut ki samla ba kyrduh kam

Jowai, Risaw 17: Shi bynta na ka thong jong ka sorkar ban pynkiew ïa ki rukom seng kam seng jam na ka bynta ki khun samla bad ïa ki longkmie kumjuh, na ka liang u Myntri Rangbah jong ka jylla u Conrad K. Sangma mynta ka sngi ula wan ban plie ïaka prokram ‘CM-Elevate’ da kaba sam ïa ki Cheque pisa ha ki lai bynta kata ïa ka YESS Meghalaya, ka SHGs bad ka Green Meghalaya.
Ïa kane ka prokram la pynlong ha District Library Auditorium Mynthong, Jowai haka jingdonlang u MLA ka Jowai ka thaiñ ma Wailadmiki Shylla, u MLA ma Lahkmen Rymbui, MLA kong Santa Mary Shylla, ki ophisar sorkar jong ki ar District West bad East Jaiñtia Hills, ki SHGs nalor kiwei kiwei de.
U Myntri Rangbah haba kren ha kane ka sngi ula ong ïa kane ka prokram ‘CM-Elevate’ la plie kyrpang na ka bynta ki lai tylli ki jait bynriew hapoh ka jylla bad ka long shi bynta ban pynkiew ïa ka ioh ka kot da kaba pynrung ha ki jingmut jong ki nongshong shnong ka jylla ba kin nang ban seng ïa ki kam la jong.
Ula pynsngew hashaw ban wan ka sorkar MDA hapoh ka jylla kala ïaid lynti shwa la 45 snem hynrei lada ïa nujor ïa ki kam kiba la pyntrei ïa ki skim bapher bapher hapoh kaba kane ka sorkar MDA ba mynta kaba dang 5 snem tam kala kiew 10 shah na kitei ki 45 snem ba la leit.
Ula pyntip tang hapoh ka West bad East Jaiñtia Hills ka prokram jong ki SHGs kila don haduh kumba (Hynriew hajar Phra spah ar phew khyndai) tylli ki SHG kiba la dep seng bad ka jingsam ïa ki skim kala poi sha ka 75 klur tam ha kine ki san snem.
Sa kawei ka prokram ka long ka ‘YESS Meghalaya’ bad kane ka prokram kan ïarap shibun eh ïa ki khun samla ba kin sdang ïa kino kino ki kam kiba lah ban pynbha haka imlang ka sahlang lyngba ka jingkyrshan jong ka sorkar bad haka juh ka por kan ïarap ïa ki samla ban lait na ki kam sniew ba bun jait, u Myntri Rangbah ula pynsngew kino kino ki Youth Club kiba apply ïa kane ka skim kin ïoh lad ban pynlong ïa kino kino ki prokram kum sports bad kiwei de.
Lyngba kane ka YESS Meghalaya prokram kila don haduh 1155 tylli ki group hapoh ka jylla tang hapoh Jaiñtia Hills kila don haduh 389 groups kiba ïoh jingkyrshan na ka sorkar.
Kaba lai jong kane ka prokram ka dei ka Green Meghalaya bad kane ka long shi bynta ban pynneh pynsah ïa ka mei mariang, ula ong hapoh ka jylla ki don bun ki khlaw ki btab ba peit da ki shnong ki thaw kumta ka donkam bha ban ai jingïada ïa ki na ka bynta ka lawei.
Hynrei lyngba kane ka prokram ka sorkar jylla kan siew pisa ïa kino kino ki kynhun ne ki riew shimet ban pynneh pynsah ïa ki khlaw ki btab kaba long 1500/- hajar tyngka na ka bynta shi hectare ïa kaba la pyntrei kam tang hapoh kane ka jylla jong ka Ri la ong u Myntri Rangbah.
“Ka jingthmu jong ka sorkar ban siew ïa kane ka pisa sha ki nongïada mariang kan ïarap ha ki sngi ban wan ïaka sorkar ba kam donkam shuh ban pyllut ïaka pisa da kaba sdang shwa ïa kane ka prokram”.
Shuh shuh ula pynsngew ha kaba ïadei bad ki jingtei ïaki jaka pait kai (Cinema) naka liang ka sorkar ka kloi ban ai jingïarap (Loan) ïa kino kino ki kynhun ne ki riew shibet kiba don jingmut ban tei ïa kitei ki jaka paitkai.
Ka jingkyrduh kam hapoh ka jylla ka jur bha ong u myntri rangbah namar katkum ka jingkhieñ ki don haduh 70 hajar ngut ki samla kiba kyrduh kam kyrduh jam haka shi snem bad katba nang ïaid ki snem kane ka dang kiew shuh shuh namar ka jingbun briew. Halor kane kum ka sorkar ba mynta kan ïaleh ban wad ki lad ki lynti na ka bynta ki samla da kaba pynmih ïa kum kine ki prokram ong u Myntri Rangbah.
Mynta ka sngi la sam ïa ki 37 tylli ki cheques hapoh ka Yess Meghalaya, Green Meghalaya bad ka SHG movement kaba la lot sha ka T.1.25 klut tyngka.