Shillong, Risaw 17: Ka Seng Khasi Kmie, ka dap da ka mynsiem kaba sngewkhia ba kan ïoh pdiang ia ka khubor halor ka jingkhlad noh ka jong u Rangbah Don Kupar Dkhar, uba long u President jong ka Seng Khasi Kmie, ha ka step jong ka 15 tarik u Risaw, 2023. Ha kane hi ka janmied, kum ka dak ka jingburom ïa une u Rangbah, ka Seng ka la pynlong ïa ka jingïalang sngewlem hapoh ïing seng ha Mawkhar, Shillong ha kaba ki Dkhot jong ka Seng, kim lah khlem da pyrto ïa u synñiang u bynhei, uba une u Rangbah u la noh haba ïadei bad ki kam ban pynneh pynsah ïa ka Niam, ki riti – ki dustur kat kum ka pyrkhat Khasi tynrai.
Ka jingduh noh jong ka Seng Khasi Kmie ïa la u President, uba long u Nongïalam u ba ha khliehduh, ka long ka jingduh kaba khraw kaba yn ym don kyntien ban batai, khamtam eh ha kum kane ka por kaba ka Seng ka dang donkam bha ïa ka jingïalam ka jong u.
U long da shisha u Rangbah uba trei da ka mynsiem kaba shlur, ka mynsiem kaba rhem bad ka jingshem phang. U la long ruh uba da ïeng skhem halor ka nongrim ban pynneh ban pynsah ïa ki matti jong u khun u khasi khara, u Hyñiewskum, u Hynñiewtrep.
Kum ka dak ka jingburom ïa une u rangbah, ka jingïalang jong ka Jylli Pyrkhat Kam jong ka Seng Khasi Kmie, kaba la long ha ka 16 tarik u Risaw, 2023, ka la shim ïa ka rai ban khang ïa ka Seng Khasi College, Jaiaw bad baroh ki Skul kiba hap hapoh ka jingpeit bad jingkhmih jong ka Seng Khasi Kmie ha ka 18 tarik u Risaw, 2023, kaba dei ka sngi leh niam kaba khatduh ïa ka met jong une u rangbah, khnang ba baroh kiba don ha kitei ki jaka pule jong ka Seng Khasi Kmie kin ïoh ban ïa shim bynta lang ban leh burom khatduh ïa une u Nongïalam jong ka Seng.
Ka jingleh niam bad ka jingle burom kaba khatduh kan sdang ha ka nohphai sngi jong ka 18 tarik u Risaw, 2023 na ïingsah kaba don ha Lumshyiap, Golflink, Shillong bad yn rah bad pynrung ïa ka met jong u President ha ïingseng ha Mawkhar, Shillong , ha shuwa ban rah sha u lumjingthang jong ka Seng Khasi Kmie ha Jaïaw.
Kum ka dak ka jingburom ïa une u rangbah, ka jingïalang jong ka Jylli Pyrkhat Kam jong ka Seng Khasi Kmie, kaba la long ha ka 16 tarik u Risaw, 2023, ka la shim ïa ka rai ban khang ïa ka Seng Khasi College, Jaïaw bad bad baroh ki School kiba hap hapoh ka jingpeit bad jingkhmih jong ka Seng Khasi Kmie ha ka 18 tarik u Risaw, 2023, kaba dei ka sngi leh niam kaba khatduh ïa ka met jong une u rangbah, khnang ba baroh kiba don ha kitei ki jaka pule jong ka Seng Khasi Kmie kin ïoh ban ïa shim bynta lang ban leh burom khatduh ïa une u Nongïalam jong ka Seng. Kane ka long katkum ka khubor ba la phah da u Bah Hainess Marbañiang, General Secretary, Seng Khasi Kmie.
