Nongpoh, Jymmang 29 : Kum ka jingai jingkyrshan ba pura ïa u Bah Ardent Miller Basaïawmoit bad ïa kiwei kiba la don bynta ha kaba ïa khun ban pynbit pynbiang noh ïa ka Job Reservation Policy hapoh ka jylla Meghalaya, ka Synjuk ki Seng Samla Shnong, Ri Bhoi ki la rai ba pynlong da ka peace rallay bad ruh ka jingïalang paidbah ha Nongpoh, ha kaba ka jingthmu ka long ban ai kata ka jingkyrshan ba pura halor ka jingdonkam ban pynkylla noh ïa ka Job Reservation Policy hapoh ka jylla.
Haba kren sha ki lad pathai khubor, u Chairman ka Synjuk ki Seng Samla Shnong Ri Bhoi District, u Samla Aristone Ryndongsngi, u la ong ba kane ka peace rally bad ka jingïalang paidbah kan long ha ka 31 tarik u Jymmang 2023 ha kaba ïa ka peace rally yn sdang na phyllaw ka ophis u DTO Nongpoh bad pynmut ha MUDA Shopping Complex, Nongpoh bad bun sa ka jingïalang paidbah ka ban sdang naduh ka por 1 baje noh phai sngi.
Kumba la pynpaw da u Samla Aristone Ryndongsngi, uba dei u Chairman ka Synjuk ki Seng Samla Shnong Ri Bhoi, u la ong haba pynlong ïa kane ka peace rally bad ka jingïalang paidbah ka dei ba long kaba ïaid beit ïaid ryntih khlem da pynmih ïa kino kino ki huri hura kiba ktah ïa ka shongsuk shongsaiñ ki paidbah bad ka jingthmu ba khmat eh jong kane ka peace rally bad ka jingïalang paidbah ka long beit ban ai jingkyrshan halor ka Job Reservation Policy ba ka sorkar jylla ka la donkam ban pynkylla ne pynbit pynbiang pura khnang ba kan nym don kano kano ka jingnoh shiliang ha ka liang ka thungkam thungjam ïa ki khun samla ka jylla.
Shuh shuh, u la ong ruh ba ka Synjuk ki Seng Samla Shnong Ri Bhoi, ka khot ka wer naduh ki longkmie ki longkpa, ki khun samla, ki riew rangbah bad baroh ki nongshong shnong shnong ka Ri Bhoi ba kin wan ban ïa shim bynta ha katei ka sngi bad ruh ba ki dei ban shim bynta ruh da ka jingtip briew tip blei ban nym mih kano kano ka huri hura kaba ktah ïa ka shong suk shongsaiñ ki paidbah ha kaba kane ka long ka jingmyntoi na ka bynta ka lawei jong ki khun samla ka Bri u Hynñiewtrep hi baroh kawei ha ka liang ka ioh kam ka ioh jam lada la lah ba pynkylla biang ïa ka Reservation Policy ha kaba kumba ka long mynta ka noh shiliang ka tara jur, u la bynrap.
