Khliehriat jymmang 29 : Ka Nehru Yuva Kendra Sangathan(NYKS), Shillong, (Ministry of Youth Affairs and Sport, Government of India), myn ha ka 26 tarik mynta u bnai ka la pynlong ïa ka District Level YUVA UTSAV ha Jaiñtia Eastern College, Khliehriat, u Member Parliament, Shillong (Lok Sabha), u Bah Vincent .H. Pala, u la long kum u kongsan, u myntri ka sorkar jylla, u Bah Kyrmen Shylla, kum u symbud kongsan, la ïa don ryngkat lang ruh u Deputy Commissioner ka East Jaiñtia Hills District, u. A. Baranwal, IAS.
Ka jingthmu jong kane ka prokram ka long ban rakhe ïa ka Azadi Ka Amrit Mahotsav, ha ka rukom ba ju ong ka Yuva Shaktis, ban pynphriang jiingtip shaphang ka jingialeh ban ïoh ïa ka jinglaitluid ka ri India bad ruh ban ai burom ïa kito kiba la len ialade ha kato ka por ba ki iakhun ban ioh laitluid.
U Bah Vincent H. Pala, u la iathuh ba kane ka NYKS ka dei ka kynhun kaba la treikam mynta la san phew wei snem, kaba don ruh ïa ka thong ban pynkup bor ïa ki samla ka ri ha ki bynta bapher bapher, u la ong ruh ba ki samla ki don ka bynta kaba kongsan bha ha ka imlang ka sahlang, kiba don bynta ruh ha ki kam bapher bapher ha ka imlang ka sahlang ban tei ïa ka ri, la bynrap ruh ba lyngba ka jingkiew stet ki kor ko bor (technology), ki samla ki ioh ïa ki rynsan ban lum jingtip bad kumjuh ruh ban pynpaw pyrthei ïa ki sap ki phong.
U Bah Pala u la batai ruh shaphang ka ‘Panch Prans’ kaba dei ka ktien phira (theme) jong kane ka prokram jong ka NYKS bad ong ba kane ka dei ka thong ban kyntiew ïa ka ri India, ban sngew sarong halor ka jingdon ki riew khraw, kumjuh ruh ban wanrah ïa ka jingïatylli, ban sngewthuh ruh ïa la ka kamram kum ki nongshong shnong ka ri, ban don ka jingkitkhleh namar ka ri, ban don ka jingïatreilang ban kyntiew ïa ka ri, ban ïarap, ban burom iwei ïa iwei.
U Bah Kyrmen Shylla, u la pynpaw ba kum u nongshong shnong jong ka ri, ka jingthmu kaba hakhmat eh ka long ban noh synñiang ban kyntiew ïa ka ri, u la ban jur ruh ba donkam ban don ki coaching center na ka bynta ki samla ba kin dup ïoh ruh ka lad ban kyntiew ïa ki sap ki phong ba ki don, ban thawlad ruh ban pynïoh ha ki ïa ki rynsan ban pynpaw ïa ki sap ki phong.
Haba kren pat shaphang ki jingeh ha ka ïohkam, ïohjam, u la ong ba ka sorkar India ka la shim ïa kane ka lad ban pynkup bor ïa ki samla ba kin pyndonkam ïa ki sap ki phong, u la kyntu ruh ïa ki samla ba kin don ka jingïatreilang bad ka sorkar ban dup lah ban kyntiew ïa ki ban long ka jingmyntoi ïa ki.
U Deputy Commissioner, East Jaintia Hills District, u la ong ba ka sorkar India ka la shim ïa kane synjam lyngba kane ka prokram YUVA UTSAV bad pynlong ha man la ki district, kaba don ruh ka jingthmu ban ïarap ïa ki khun samla bad kane ka Yuva Utsav ka dei ka ban lam lynti ïa ki samla ba kin kiew la ka dei ha ka sport bad kiwei kiwei bad ruh ban kyntiew ïa ka jinglong jingman jong ki samla, u la kyntu ïa ki khynnan samla ba ki dei ruh ban kyntiew ïalade katba ki lah da kaba pynlut por ruh ha ki jingpule bad ha kino kino ki jait jingpule ba kin dup kiew shaphrang bad kin ïoh ïa ka lawei kaba phyrnai.
