Shillong, Jymmang, 28: Ka Khasi Student’s Union (KSU) ha ka sngi U Blei ka la dawa ïa ka Sorkar Meghalaya Democratic Alliance (MDA) ba la ïalam da ka National Peoples Party (NPP) ba ka dei ban khot ïakren noh mardor ïa ki nongïalam jong ka Voice of the People Party (VPP) shwa ba ka ding kan klang.
“La ïaid san sngi kynthih ka jingshah jingit jong une u rangbah halor ki ishu jong ka ri bad ka jaidbynriew baroh kawei. Kum ka seng lada dei ïano ïano ruh kiba shim ïa ki ishu jong ka jaidbynriew ngi ai ka kti ka mon bad ka kti ka diang ban ai jingkyrshan,” ong u President ka KSU, u samla Lambokstarwell Marngar ha ka jingïakren bad ki lad pathai khubor hadien ka jingleit jngoh bad ai mynsiem ïa u President ka VPP u Bah Ardent M. Basaïawmoit uba dang bteng ïa ka jingshah jingit kaba la kynjoh mynta sha ka sngi kaba san.
“Naduh kaba sdang hi ngi la kren da kaba shai naduh ki snem kiba mynshwa ba ka Sorkar ka dei ban pyrkhat ban puson ban khmih bniah biang sa shisien ïa ka bhah thungkam thungjam kaba la don ha kane ka jylla jong ngi la san phew snem. Naduh u snem 1972 ym pat shym la lah ban bishar biang ïa ka polisi. Nga sngew ba ka dei ka ïa kaba biang tam ïa ka Sorkar ban peit bniah ïa kane ka mat. Kane ka mat, kam dei shuh ka jingdawa jongno re jongno hynrei kumba ngi ïohi mynta ka dei ka jingdawa jong uba bun balang bad ka jaidbynriew ka Bri u Hynñiewtrep baroh kawei,” ong u President ka KSU.
“Ka jingshah thngan ka la ïaid mynta la san sngi hynrei ngi ïohi ba ka Sorkar ka la long kuman bad ka sngap jar jar,” u la kynthoh.
“Ka kyrwoh kaba ngi kwah ban phah sha ka Sorkar ka long, Sorkar lada phi don ka jingkitkhlieh ïa ka lawei bad ïa ka pateng ka ban sa wan, khot sha ka miej jingïakren ïa une u rangbah (Bah Ardent) bad ïa ka kynhun jong u namarba ngi ïohi ha kane ka kynhun (VPP) ki don ki khraw pyrkhat, ki don ki riewshemphang ban ïatai kumno ban pynwandur ïa kane ka Reservation Policy kumba ki paidbah ki angnud. Dei ban bishar, dei ban khmih bniah biang sa shisien na ka bynta ka jingmyntoi jong uba bun balang bad khamtam eh na ka bynta ka jingmyntoi jong ki samla pule,” la ong u President ka KSU.
U la ong ba ka seng ka shahniah tylli ha u Bah Ardent bad ka kynhun jong u, ban pyntyllun ïa kane ka kam khnang ba ka jingïakhih kan ym long kaba kulmar jingmut.
Haba kylli halor ka jingthaw jong ka Sorkar ïa ka komiti ban ïakren halor ka Reservation Roster System, u samla Lambokstarwell u la ong, “kato ka komiti ka long beit thik tang na ka bynta ka Roster System hynrei kaei kaba ngi kwah ïa ka Sorkar ka long ba kan ïakren ïa ka Reservation Policy.”
“San sngi ka la ïaid, kam (Sorkar) shuh ban dang kuman. Wat ym ailad ïa ka ding kan klang, wat ym ailad ïa ka jingbitar ki samla kan long da kumwei pat. Ngi dang ïaishah bad ngi dang ïai ap bad ka Sorkar ka dei ban sngewthuh ïa kata bad ngi ieh ha ka jingstad jong ka Sorkar kumno ka dei ban leh,” la bynrap u samla Lambokstarwell.
“Ka jingkyntu na ka liang jong ka seng ka long khot ïakren ïa kine ki rangbah (nongïalam ka VPP) kumno ban bishar ïa ka Reservation Policy. Ngi sngewthuh shai ba ka Sorkar ka don ïa ka tnat Aiñ, ka don ïa ki ophisar bad ka dei ban khot ïa kine ki rangbah sha ka miej jingkren,” u la ong.
“Lada ka sorkar ka leh kyllut, na ka liang ka seng kam tip kaei ka ban jia nangne shakhmat bad ka sorkar kam dei ban ailad ïa ka ding ba kan klang,” la ïai ban u President ka KSU.
