Ban kyntiew ïa ka kam jngohkai lyngba ki jaka jngohkai pyrthei khot jingïalang kyrpang u DC
Mawkyrwat, ‘Nailar 24 : U Deputy Commissioner jong ka South West Khasi Hills District, Mawkyrwat mynta ka sngi u la pynlong ïa ka jingïalang bad ki trai jong kiba don ki jaka jngohkai ‘Tourist Spots’ kiba don ha baroh kawei ka South West Khasi Hills District na ka bynta ban kyntiew ïa ka kam jngohkai pyrthei ha kane ka distrik ha kaba ïa ka jingïalang la pynlong ha Multipurpose Hall jong ka DC ophis, Laitlawsang, Mawkyrwat.
U bah T. Lyngwa, IAS, Deputy Commissioner, South West Khasi Hills District ha ka jingkren jong u, u la ong ba kane ka distrik ka don shibun ki jaka jngohkai kiba itynnad kiba lah ban khring ïa ki Tourist ban wan jngohkai sha kane ka jaka da kaba u bynrap ba ka jingthmu ba kongsan jong kane ka jingïakyndih ne jingïalang ka long ban lum ïa baroh ki trai jong ki Tourist Spots bad kito kiba la sdang ïa ki ïing sah-miet ne homestay na ka bynta ban ïa mir bad ïa phylliew jingmut halor kumno ban nang kham pynbha pynjanai bad ban kyntiew ïa kane ka kam jngohkai ha kane ka dong ka thaiñ.
Shuh shuh u la ïathuh ba la thaw ïa ka Adhoc Committee South West Khasi Hills Tourism Development Forum ha kaba ïadei bad kane ka bynta bad ynsa buh ruh ïa ka Tourism Information Centre ha kaba yn thung da ki Tourist Guide kiba la ïoh jonghikai (training) na ka sorkar. “Ha kaba ïadei pat bad kiwei kiwei ki jingshna (infrastructure) u la ïathuh ba la khot ïa u Consultant na ka bynta ban pynkhreh ïa ka Master Plan bad ban buh dak (mapping) ïa ki Tourist Spots kiba don ha ka South West Khasi Hills District khnang ban lah ban pynurlong ïa kane ka jingthmu”, ong u DC.
Ha kaba khatduh, u la ai khublei ïa baroh kiba la wan ban ïashimbynta bad kiba la shimkhia na ka bynta kane ka jingthmu kaba bha da kaba kyrmen ba ki kam ki kam kin ïaid beit shakhmat.
Lah ruh ban kdew ba ha kane ka jingïakyndih la wan ïashimbynta da kumba 23 ngut ki trai jong ki Tourist Spots kaba kynthup naduh u bah B. Shylla, Owner Tourist Deborlew Tynnai, South West Khasi Hills, u Manager ka Jakrem Hotspring, Umjaraiñ, u Secretary ka Mawthawpdah Area Rilang Fishing Association, u Secretary ka Iawpaw Adventure & Tourism Association, Nongnah, u Secretary ka Meimariang Tourism Cooperative Society Ltd Larem, Nongsynrieh haduh u Secretary ka Kynrewmyllah Adventure Training Centre & Eco Tourism kiwei de.
Nangta, la wan lang ruh ki Myntri bad Secretary jong ki shnong kum ka Mawranglang, Mawten, Rangmaw, Photjaud, Nongkdait, Nongktieh, Phlangdiloiñ, Phlangmawprah, Umpung, Mawrap bad Nonglang.