Nongpoh, Nailar 24: Ka kong Ampareen Lyngdoh Myntri ka tnad ka koit ka khiah ka jylla mynta ka sngi kala plie paidbah ïaka University Hospital of Ayurveda & Naturopathy (UHAN), kaba dei kawei naki jaka sumar kaba la heh bad biang lut ki jaka sumar bad kaba don kumba 100 jingthiah ha skulbah University of Science and Technology kaba don ha Khanapara.
Haba kren ha katei ka sngi naka liang ka kong Ampareen Lyngdoh kala ong ba ka UHAN kadei kawei naki jaka sumar ka ban ai ka jingshakri kaba paka sha ki paidbah bad ka skulbah USTM ka la long kum ka shlem hikai kaba la biang lut nadong shadong bala pynïasyriem kum ka shnong jong ka jaka hikai bad ka pule ka puthi bad ka la pynpaw ruh ia ka jingsngewkmen kaba khraw ba la ioh ban plie paidbah noh syndon ïa ka mynta ka sngi.
Naka liang katei ka myntri sorkar jylla kala ai ruh ka jingïaroh halor ka jingkiew sted katei ka skulbah naduh bala seng bad saiñdur iaka ha katei ka jaka kaba ki samla pule na kylleng ka thaiñ Shatei Lam Mihngi ki wan ban wad jingstad bad pynthikna ruh ba ka sorkar Meghalaya kan ai ka jingkyrshan pura ban tei ïaka PA Sangma International Medical College and Hospital ha katei ka skulbah.
U Mahbubul Hoque Chancellor ka USTM u la ong ba shuwa u snem 2030 baroh ki tnad ka koit ka khiah naduh ka Allopathy, Unani, Sidha bad Homeopathy kin don ha katei ka skulbah, bad haba phai sha katei ka hospital kaba dang shu plie u Hoque u la ong ba katei ka jaka sumar kan ai ka jingshakri kaba paka tam naka bynta ki paidbah haki liang bapher bapher ha kaba kin don ruh ki doctor bad ki nongsumar kiba la shah pyntbit bha ïalade.
Lyngba katei ka jaka sumar bala plie paidbah ha katei ka sngi kan long ruh kum ka jaka wad bñiah jong ki jait jingpang bapher bapher ka ban long ruh kawei naki jaka sumar ban paw haka thaiñ shatei Lam mihngi jong ka ri.
