Nongpoh, Naiwieng 13: Kum ka jingkynmaw burom ïa uwei na u nongïalam ba khraw ka jylla bad uba dei ruh u nongmihkhmat bad u Myntri barim ka jylla na Umroi Constituency, ka Mawlasnai Football Association mynta ka sngi ka la plie pyrda noh da kawei ka football tournament ba la tip kyrteng kum ka ‘E.K Mawlong Memorial Football Trophy’ na ka bynta ban kynmaw burom ïa u (L) E.M Mawlong, bam kwai ha dwar u Blei.
Ïa kane ka tournament ban ai burom ïa une u nongïalam la pynlong ha Madan ïalehkai phutbol ka Mawlsnai, ha kaba u Member ka Autonomous Council ka Karbui Anglong Autonomous Council, u Abhijit Kro u la wan ban plie pyrda kum u kongsan bad la sakhi lang ruh da ka jingdon ryngkat u Bah Andrew Lyngdoh, uba dei u khun jong u Bah E.K Mawlong, u Bah Eugeneson Lyngdoh, u khlur ïalehkai phutbol ka ri na ka jylla bad kynthup kiwei kiwei ki riew rangbah na ka thaiñ Mawlasnai bad na Ri Bhoi District.
Kumba la pynpaw da ki nongïalam ka Mawlasnai Football Association, kane ka tournament ne ka jingïalehkai phutbol ba la pynlong ha kane ka madan ka long ban ai burom ïa u (L) E.K Mawlong kum u nongmihkhmat bad u nongïalam ka jylla, kiba dei halor shibun ki synñiang ki bynhei kiba u la synñiang na ka bynta ka bha ka mait, ka roi ka par jong ka thaiñ bad ha ka jylla hi baroh kawei.
Ki nongkrenr ha kane ka jingïalang plie ïa ka tournament naduh u kongsan, u Abhijit Kro, u Bah Eugeneson Lyngdoh bad u Bah Andrew Lyngdoh, khun jong u Bah E.K Mawlong, ki la ai ka jingïaroh ïa ka Mawlasnai Football Association kiba la poi pyrkhat ban kynmaw burom ïa une u nongïalam ba khraw ka jylla.
Ki la pynpaw ruh ba kum u nongïalam hapoh ka jylla, u Bah E.K Mawlong u la dep ban leh shibun ki kam kiba khraw kiba ai jingmyntoi ïa ki paidbah ka jylla bad kum u nongïalam uba la leh shibun ki kam ban kyntiew ïa ka jylla u don hok ban ioh ïa ka jingïaroh bad ka jingkynmaw burom wat lada um don shuh ha kane ka sla jong ka pyrthei.
Shuh shuh, ki la kyntu ruh ïa ka Mawlasnai Football Association da kaba ong, ba kane ka jingpynlong ïa kane ka tournament ban ai burom ïa une u nongïalam kam dei satia tang ban kynmaw burom ïa u kum u nongïalam uba la synñiang na ka bynta ban kyntiew ïa ka jylla, hynrei ka dei ruh shi bynta ban kyntiew ïa ka sap ka phong jong ki khun samla ba don sap ha ka jingïalehkai phutbol ba kane ka Association kan dang ïaid shaphrang ban plie lad plie lynti ïa ki samla ba don sap da kaba ka la pynlong kum kane ka tournament.
Haba phai sha ka jingïakhun ki ar kynhun kata ka Hills United Diphu pyrshah ïa ka Khlieh Mawlong Football Club ha kane ka sngi plie pyrda ïa ka tournament, ka Hills United Diphu ka la ioh rah ïa ka nam jop, da kaba ka la pynrem noh ïa ka Khlieh Mawlieh Football Club da 4-2 ha ka jingïashut tiebreaker.
Ha ka jingïakhun naduh ka kylla step haduh ka kylla miet ka jingïakhun ka la kut ha ka jingïathep kol kaba mar 3 kol, hynrei ha ka jingshim rai da u Referee lyngba ka tiebreaker ka Hills United Diphu ka la ioh ban rah ïa ka nam jop lyngba ka 4-2 kol ba kan long ka nongjop ha kane ka sngi ba la plie pyrda ïa kane ka tournament ban ai burom ïa u Bah EK Mawlong kum uwei na u nongmihkhmat bad u nongïalam ba khraw ka jylla Meghalaya.
