Ban ïoh ka roi ka par ba biang kyrshan ïa u briew uba la don lypa bad ka Sorkar: CM

Mawkyrwat, Rymphang 14: U Myntri Rangbah ka Jylla Meghalaya, u Conrad K Sangma ha ka sngi Thohdieng u la hiar sha South West Khasi Hills District ban pan jingkyrshan na ki paidbah ba kin ai lem ka kti kamon ka kti kadiang na ka bynta u Bah Carness Sohshang uba long u kyrtong jong ka NPP napoh ka Mawkyrwat Constituency khnang ba roi ka par kan lah ban tyllun ha ki bynta baroh.
U la kyrpad ruh ba kin phah ïa u Bah Carness ba un long ruh un long ka jingkieng ïa ki kam pynroi hapoh ka dong ka thaiñ. Ha kajuh ka por u la kyntu ba kum ki paidbah kim dei ban sngap ne shah ïalam bakla ha ki jingkren jong ki politics ha ki rynsan social media ha kum kine ki sngi hynrei kum ki paidbah ki dei ban jied ïa u briew uba la don lypa ha ka sorkar.
U Myntri Rangbah ula leit jngoh ha ka shnong Mawlangwir na ka bynta ban kyntiew ïa ki kam jngohkai pyrthei, sha Rangmaw na ka bynta ka jingpynkhreh ïa ka KJP Synod 2028 bad ïa ka Jingïaseng Assembly jong ka Balang Church of God bad ha Sakwang na ka bynta ka madan heh, bad kiwei de ki kam pynroi.
Ha kane ka juh hi ka sngi u Myntri Rangbah u la leit ruh ha ka Sngimawlein, Mawthawpdah, Umdohlun, Rangblang Sohsyniang, Mawlangwir, Rangmaw, Sakwang bad ha Sngap Syiem College.