Nongpoh, Nailur 09 : Ka Umroi District jong ka Mawbuh Ri Bhoi Presbytery ba hap ha ka KJP Synod Sepngi hynin ka sngi lyngba kawei ka Committee ba la tip kum ka Rural Social Economic & Life Development Committee mynta ka sngi ki la shim da kawei ka sienjam ban pynlait da ki symbai Dohkha ha kawei ka Wah ha Umroi shi bynta ka jingïada ïa ka mariang nalor ki kam ba ka shakri ha kam jong u Blei.
Lyngba katei ka Committee, ka Rural Social Economic & Life Development Committee ka la lah ban theh haduih 40 kilo ki symbai dohkha ha katei ka wah kaba ki ju khot ka wah Kyrwa ba hap hapoh u u pud u sam ka Dorbar Shnong Umroi Pyllun ha Ri Bhoi.
Ïa kine ki jingleit theh symbai dohkha ha katei ka wah la wan shim bynta da u Bah O. Kharpuri,uba dei u Beat Officer ka Soil & Water Conservation, Umroi Beat House kum u kongsan bad la sakhi lang ruh da ka jingdon lang u Rev. E.R Kharkrang, uwei na u pastor rangbah ka KJP Synod Sepngi, u Bah P.B Sylliang, Chairman ka Dorbar Shnong Umroi Pyllun, u Bah Shalan Sylliang, Secretary katei ka Committee, u Bah Kynsai Nengnong, Secretary ka Dorbar Umroi Pyllun bad kiwei kiwei ki nongïalam shnong bad na katei ka Committee. Ïa ka jingïalang la pynïaid da u Tb. R.Makri.
Haba kren ha kane ka sngi, naduh u Bah O. Kharpuri kum u ophisar na ka tnad Soil & Conservation ka Umroi Beat bad u Rev. R.R Kharkrang bad ruh u Bah P.B Sylliang, ki la ai jingïaroh ïa kane ka Committee ha kaba nalor ka kam shakri Blei ki la shim bynta lang ruh ban synñiang na ka bynta ban ïada ïa ka mariang bad ban pynneh pynsah ïa ki dohkha dohpnat ha katei ka wah.
Kumba la pynpaw da kitei ki nongkren ki la ong ruh ba ka thong ba la pynlait ïa kine ki dohkha ha katei ka wah ka long shi bynta ban dang pynoi ïa ki dohkha ha katei ka wah ha kaba ngi dei ban sngewthuh ym tang ban bam ïa ki, hynrei ban sumar ruh ïa ki khnang ba kin nym duhjaid kumba u Blei u la buh beit buh ryntih ïa baroh ki kynja ba im ha sla jong kane ka pyrthei.
Shuh shuh, ki la kyntu ruh ïa ki paidbah ba kin ai ka jingïatrei lang bad ka dorbar shnong ym tang ha kaba pynneh pynsah ïa ki kynja dohum ha ki wah, hynrei ba ki don ruh kata ka jingïatrei lang na ka bynta ban ïada ïa ka mariang namar hapneh jong ka mei mariang ki don shibun ki kynja ba im ba la thaw kyrpang da u Blei kiba long ka jingmyntoi na ka bynta u khun bynriew.
