Ban wanrah ka jingïajan bad ki khynnah skul rim pynlong ka ICFAI ia ka jingïakynduh lang

Shillong, Nailur 9: Ka ICFAI University Meghalaya, Tura Campus, ha ka sien ba nyngkong ka la pynlong ïa ka Alumni Meet 2023 kum shi bynta ban wanrah ka jingïajan bad ki samla pule barim ban wanrah ïa ka jingkylla ha ka imlang sahlang.
Ka phang pdeng jong ka Alumni Meet 2023 ka long ‘Alumni Connect: Ignite the Flame’ ha kaba palat 100 ki samla pule barim lane ki Alumni ki la wan shim bynta da lade bad lyngba ka Online.
Bun ngut ki Alumni kiba wan shim bynta ha kane ka Alumni Meet 2023, ki kynthup ïa kito kiba la paw bha ha ka liang ki kam sorkar, ki kam shimet, shipai, ka pule puthi, Banking, ka rep ka riang bad ki nongseng kam lajong.
Haba kren ha kane ka sngi ka Vice Chancellor ka Dr. Alicia Gatphoh ka la kren halor ki soh ba la kheit da ka University bad ka la kren ruh halor ka jingdonkam ban thaw ïa ka Univeristy Alumni Network bad ban pynkhlaiñ ïa ka jingïadei kam hapdeng ki samla pule barim bad ka University ba kin synniang lem ïa ka jingshemphang jong ki.
Ka Advisor ka ICFAI University Meghalaya ka Dr. V S B Sangma ka la pdiang sngewbha ïa ki Alumni jong ka University bad ka la ai ka jingïaroh ïa ki samla pule barim kiba la shim ïa kane ka sienjam ban ïatreilang na ka bynta ka bha ka miat ki samla pule jong kane ka University.
Nalor kane ki Alumni ka ICFAI Tura Unit ki la pynlong ka jingïalang bad ki la thaw ïa ka Committee ba shipor bad ki la buh ruh ïa ki mat jong kane ka Committee.