Bam duh ka ding ïa ka ïing u RS ha Marngar katba dang leit pynshngaiñ ha ïing ba khlad ka samla

Nongpoh, Jymmang 05: Ha kawei ka jingjia pluh ding, katba ki trai iing jong kawei ka longiing haka shnong Nongagang Marngar ki dang leit ban pynshngaiñ ïaka iing jong ka samla Walinda Binong kaba la khlad noh dang shen ha Rajasthan, ka ding kala klang bad bam duh ïa baroh ki jingdon jingem naduh u kba u khaw, ki jaiñ ki nep ki kot ki sla ba donkam, ki tiar thir ksai ha kaba ka jingjulor kala kot da ki lakh tyngka.
Katei ka jingjia kala jia hynnin ka miet haka por 10 shiteng eiei, kaba dei ruh ka iing jong u Bah O Binong Rangbah Shnong ka Nongagang ha Marngar kaba don Marjan bad ka ïing jong ka samla Walinda Binong kiba dang don ruh ka jingïadei shi ïing shisem.
Haba pyntip ïa katei ka jingjia naka liang u Bah O Binong u ba dei ruh u Rangbah Shnong bad u trai katei ka ïing u la pynpaw ïaka jingsngewsih kaba khraw halor kane ka jingjia ba khlem poi pyrkhat. U la iathuh kane ka jingjia kala jia haka por 10 shiteng eiei bad dei lyngba ka jingsted jong ki paidbah nongshong shnong la lah ban tem noh ïa katei ka ding kaba la klang kiba la mih paidbah ban pynlip ïaka ding bad ruh da ka jingpoi jong ki kali pynlip ding.
U la ïathuh ruh ba katei ka jingjia kala jia haka por ba dang lip ka light bad ki hap ban pyndonkam da u mombati ban pynshai namar ba ki dang ïa treikam bad u la ong ba dei ruh haka por ba ki la kyrkieh ban leit peit miet ban pynshngaiñ haka ïing ïap ka ba don marjan bad ki la kum klet ban pynlip ïa u mombati bala pynlong pat ban kem ding bad bam duh ïa katei ka ïing.
Naka liang u Bah O Binong u la ong ruh ba ka jinglut jingsep kala kot sha ki lakh tyngka namar baroh ki jingdon jingem kila ingkhong khaid bad kyrpad ruh sha ka sorkar naduh u MLA ban shimkhia naka bynta ki lad jingïarap.