Shano phi jah baroh shi katto ba phi khohreh khynra Trading License tang ynda la don ka elekshon

Sohra, Jymmang 05: U President ka Voice of the People Party (VPP) u Bah Ardent M Basaïawmoit ha ka sngi Thohdieng u la kren pharshi ïa ka jingkhynra Trading License jong ka KHADC dang ha kine ki khyndiat sngi kiba la dep, da kaba ong ba kane ka jingkhohreh da u Chief Excutive Member ka KHADC u Bah Titosstarwell Chyne ban hiar hi sha Ïewduh ban khynra Trading License ka long tang ynda ka elekshon MDC ka la poi ha thmit.
Haba kren ha ka jingïalang pynrung dkhot jong ka VPP ha Saitsohpen, Sohra u Bah Ardent u la buh jingkylli ïa ka KHADC bad ki nongsynshar jong ka kiba ïohthiah baroh shikatto hynrei kiba khohreh khynra Trading License ynda la jan ka elekshon MDC.
“Nga ithamula haba peit ha kine ki khyndiat sngi ba u CEM uba la shong ha ka khet synshar jong ka KHADC la bun bun snem hynrei ym ju ïohi ban don kano kano ka jingkhynra Trading License hynrei ynda mynta ba la jan ka elekshon MDC hana u la khohreh ban hiar hi ban khynra License,” ong u Bah Ardent.
“Nga kwah ban kylli ha kine ki snem kiba phi la long CEM katno tylli ki Trading License phi la ai sha ki bar jylla bad nga kwah ban pyntip ïa phi ba ha ka por ba nga long CEM tang 6 bnai naduh ka sngi kaba sdang ngi la khynra Trading License bad ngim shym la ai License thymmai shuh sha ki bar jylla,” u la bynrap.
Haba kynthoh halor ka jingong u Bah Titos ba ki khun ba la kha na ka kmie Khasi bad u Kpa Khasi kim dei shuh ki Khasi lada ki shim jait a u kpa, u Bah Ardent u la kren pharshi da kaba buh jingkylli la kito kiba ai jait da u dak thoh phareng bad kynnnoh Phareng ki dei mo ki Khasi.
“Ha ki dak thoh Khasi ym ju don dak thoh C satia hynrei kumno ïa kito kiba ai jait da u dak phareng ki sngew Khasi ïa lade bad nga kwah ban ong ba kiba la sngew phareng bad ai jait pahreng ïa lade wat wan hikai skul ïa ngi,” u la ong.
“Ngam ju ong ba ngin ai jait sha u kpa mynno mynno ruh hynrei nga kwah ban kylli ïa u CEM hato kham donhok ki khun kiba kha na u tnga u Punjabi ne Bihari ne kiwei pat ki khyllah jait bad ka kynthei Khasi ban ong ba ki dei ki Khasi tang namar ba ki dei kiba ai jait kynthei, nga kwah ba kin peit ruh ïa ka hukum ka Kashari kaba naduh ki snem 1960 eiei ka kren kumno ïa kane,” u la bynrap,
U la ong ruh ba ka jingpyrshang jong ki seng saiñ pyrthei ban pynsgewthuh bakla ïa ka VPP da kaba ong ba kan pynkylla ïa ka rukom ai jait ka dei tang namar ki la itieng palat ïa ka party namar u paidbah u ïohi ba ka VPP ka dei sa tang ma ka ka jingkyrmen ka jaidbynriew,
“Ki kwah ban pynkulmar jingmut ïa u paidbah bad ki pynmih ki jingkynnoh kiba lai phew jait hynrei ngam artatien ba u paidbah uba la stad un ïohi ïa ka jingmut ba beit jong ngi na bynta ka jaidbynriew bad ka jylla hi baroh,” ong u Bah ardent.