Ym tang ïa ka NPP hynrei khywit lang u President ka Congress ïa ka UDP ha Sohïong
Man ka san snem shah pynbiej ki paidbah : Kyrtong
Shillong, Jymmang 05 : U President ka Meghalaya Pradesh Congress Committee (MPCC) Bah Vincent H Pala hynne ka sngi u la hiar sha Sohiong ban leit ïalap elekshon na bynta u kyrtong jong ki, Bah S Osborne Kharjana uban aireng ha kane ka elekshon kaban long ha ka 10tarik mynta u bnai.
Haba kren ha ka jingïalang kaba long ha iew Sohiong, u Bah Pala u la ong ba lada long kumno kumno ruh ki donkam ban jop ïa katei ka constituency. “U kyrtong ba ngi ai um dei u nongkhaii dewiong lane u kontraktor hynrei u dei uba la ïapein ïaka kam namar u kwah ban shakri ïa ki paidbah,” ong u President.
Shuh shuh u ong ruh ba da ka jingjop ïa ka Sohiong, ka party kan sa ïoh ïa ka bor ban don noh ïa u nongïalam ka Liang Pyrshah kaba la shu shong thylli baroh shi katta khnang ba ka Liang Pyrshah kan long kaba khlaiñ.
Ha kajuh ka por, u Bah Pala u la ong ruh ba naduh ka NPP haduh ka UDP ha ka elekshon ki ïa kynthoh ïa kynnoh iwei ïa iwei hynrei ki long kawei. “Hangne u UDP u bein ïa ka NPP bad ka NPP ka bein ïa ka UDP hynrei hangtei kajuh ka polisi ki ïatrei kam,” u la ong.
Haba bynrap lang, u kyrtong ka Congress u la ong ba u shabi jong ka Jaidbynriew la bat da u Rangbah Shnong, MDC, MLA bad ruh da u MP. “Kumta u ong ba ka jingjied ia ki kadei ka kamram kaba nyngkong tam eh na bynta ka ri bad ka jaidbynriew hi baroh kawei,” u la ong haba kren ha katei ka jingïalang.
Shuh shuh u ong ruh ba watla ki la ïoh la 50 snem ïa ka jylla hynrei man ka san snem pat ki shah pynbiej ha ki nongïalam party ha ki shnong da ka pisa ha ka por elekshon ban pynjop ïa kane ne ïa katai ka party.
U ong ruh ba man ki elekshon ki kren ïa ka roi ka par hynrei ynda la jop elekshon dei ki MLA bad ki nongïalam kiba nang roi bad heh katba u paidbah nang par bad nang raikhoh. “Kane ka ju jia man ka san snem bad ka long kaba sngewsynei haduh katta katta.”
Kumta u ong ba la pynkup bor ha ki nongshong ban jied ïa ki nongmihkhmat namar kadei ha ki ban jied ïa ka khia ka shon bad ka im ka ïap jong ka ri bad ka Jaidbynriew.
Shwa kane la ïoh ruh ïa ka jingkren na u Bah Hambert Thangkhiew, Secretary ka Congress na Diengiei Area uba la batai ïa ka rukom ïalap elekshon jong ka party da kaba ki khlem wai kali ne pynlong jingïalang heh hynrei da kaba leit pynlong haman la ki shnong.