Kyntu ïa ki Myntri Rangbah ki 4 jylla ban ïatrei lang ban wanrah jingsuk

Shillong, Jymmang 5 : Ka Khasi Jaintia Presbyterian Assembly (KJPA) ka pynpaw ka jingsngewsih halor ka jingjia jongka jingïakhih kaba don mynta ha ka jylla Manipur hapdeng ki jaidbynriew riewlum Meitei bad Kuki ha kaba kumba 24 tylli ki ïingmane la pynjot pynpra kynthup ïa bun ki skul bad jingtei ba dei jong ki Kuki. Kane ka la wanrah ka jingïaumsnam ba shyrkhei ha kaba bun ruh ki mynsiem briew bakordor ki la duh ei ïa ka jingim. Kane ka jingsngewpher hapdeng ki paid nonghshong shnong ka lah ban ktah ïa kane ka thaiñ hi baroh kawei lada ym lah ban teh lakam ïa ka. Ka jingïakhih ban ïoh ïa ka hok ka dei ban long da ka lynti kaba dei.
Ka KJPA ka kyrpad ïa ki Myntri Rangbah ka jylla Manipur, Mizoram, Assam bad Meghalaya ban ïatrei lang ban wanrah ka jingshong suk. Ha kajuh ka por ka seng saiñ hima kaba synshar ha Manipur ka dei ban kiar na ka jingïashah shilliang khnang ban ïada ïaki rit paid kiba long ki Khristan kiba don ha Manipur. Ka jingduwai ka long na ka bynta kito kiba la ngat ha ki jingshitom bad jingduh ïa ki jingdon jingem bad ïa ki baieit bathoiñ ba U Blei Un kyrshan bad ïarap ïa ki ha kaba kum kane ka por ba sngewsih. Kane ka long kat kum ka khubor ba la pyllait da u Senior Administrative Secretary ka KJPA u Rev. S.R Dkhar.