Long kiba jai jai bad ïa im suk im saiñ ong u DGP ïa ki Kuki bad Meitei ba sah ha Meghalaya

Shillong, Jymmang, 05: U Director General of Police (DGP) ka Jylla u Dr. LR Bishnoi ha ka sngi Thohdieng u la lum da ka jingïalang hapdeng ki nongïalam bad ki samla na ka jaidbynriew Kuki bad Meitei kiba shong basah ha nongbah Shillong hadien ba ka la mih ka jingïashoh ïadat hapdeng kine ki ar jaidbynriew ha ka janmiet Sngi Palei ha Nongshiliang, Nongthymmai, Shillong na ka jingjia ha ka jylla Manipur kaba la pluh na ka daw jingpyrshah jong ki riewlum Kuki ban ai kyrdan Schedule Tribe ïa ki Meitei ki bym dei ki riewlum.
Ha ka jingïalang kaba la long ha Naga Durbar Hall, ha Nagaland House, ha Nongrim Hills Shillong, ba la synran lang da u Superintendent of Police ka East Khasi Hills u Bah Sylvester Nongtnger, u Superintendent of Police (City) u Bah Vivek Syiem bad kiwei kiwei ki heh Pulit, u DGP u la pynkohnguh ïa ki Kuki bad ïa ki Meitei ba kin pynneh ïa ka shongsuk shongsaiñ bad ban long kiba jaijai bad ban im suk im saiñ ha kane ka nongbah Shillong bad ba kim dei ban thaw ïa kino kino ki jingïakynad para ma ki.
Ha ka jingïakren bad ki lad pathai khubor, u Dr. Bishnoi u la ïathuh ba ki 16 ngut kiba donkti ban ïashoh la pyllait noh hadien ba la pynkonguh ïa ki katkum ka Section 107 bad ka Section 109 Criminal Procedure Code (CrPC) ba kim dei ban thaw jingkulmar shuh nangne shakhmat hynrei ban pynneh ïa ka shongsuk shongsaiñ ha kane ka nongbah Shillong.