Bam duh ka ding ïa ka ïing ha Lawdisai, lait im ka kmie, u kpa bad ki khun ba leit lyngkha

0

Mawthadraishan, Risaw 04: Kawei ka longïing kaba kynthup ïa i Kong Khiar Thabah bad u Bah Stad Sohphoh ryngkat bad 8 ngut ki khun ki ksiew ki la lait im na ka jingpluh ding kaba la bam duh ïing jong ki baroh kawei.
Kane ka la jia ha Lawdisai, kaba long kawei na ki Shnong ba don ha ka Mawthadraishan C&RD Block, Eastern West Khasi Hills District. Katkum ka jingïathuh ki paidbah na katei ka Shnong la ong kane ka ïing ka la pluh kynsan ha ka por 9 baje eiei mynstep bad kine kiba sah ha kane ka ïing ki la ïa leit sha ka jaka rep bad khang tala ïa ka ïing.
Ki paidbah nong shongshnong ki la pyrshang ban ïarap ban pyllip ïa ka ding bad ban sei ïa ki tiar na ïing, hynrei kim shym la ïoh lad shuh namar ka jingsted ka ding kaba la sdang na kawei ka kamra bad pur sha kiwei ki bynta jong ka ïing.
La ïathuh ba ka ding ka la bam duh ïa baroh ki tiar ki tar bad kiwei ki jingdon jingem jong kane ka ïing.
Katkum ka jingïathuh ki paidbah la suba ba kane ka jingpluh ka ïing ka lah ban de na ka jingthut ka bording elektrik hapoh ïing. Na ka liang ka shnong ka la pyntip ïa kane ka jingjia sha ki bor pynïaid ka Mawthadraishan C&RD Block.

Leave A Reply

Your email address will not be published.