Ïaid beit ka lehñiam Durga Puja ha Nartiang yn pynkut mynta ka sngi

0

Jowai, Risaw 04: Ka shnong Nartiang ka dei kawei na ki shnong hapoh ka Ri-lum Khasi Jaiñtia kaba dang pynneh pynsah ïa kane ka lehñiam Durga Puja jong ki Pnar (Hindu) ïa kaba la leh naduh ki por mynshwa ha ka ïing Blei ka Durga ‘Maa Jayantee Temple’ kaba don ha Nartiang Pohshnong.
Ïa kane ka lehñiam Durga Puja ha Nartiang la sdang ïa ka naduh ka miet jong ka 1 tarik bad lashim ka sngi 5 tarik ym pyndep ïa ka lehñiam da kaba leit pynngam ïa ka Blei bala shna sa ka Lakait ha ki bynta ka wah Myntang ha ryngkat ka kyrhoi ka risa, bad kan don ruh ka jingshad masteh ha ka por janmiet, hynrei mynta ka sngi 2 tarik la pyndep ïa ka kñia pom blang ha phyllaw ka Mandir.
Katkum ka jingïathuh ba kane ka Temple (Mandir) ha Nartiang ka dei kaba la rim bha kala don palat ïa ka 500 snem mynshwa, ha kaba la pynlong ïa ka lehñiam ha kane ka jaka naduh ki por hyndai hynthai jong u ‘Syiem Jaiñtiapur’ da kaba ki ju kñia da u briew ha kane ka jaka la ïathuh u ma Salong Lamare Dolloi ka Elaka Nartiang.
Hynrei dei hadien ba la wan poi ka sorkar phareng kane ka kñia briew kala duh la dam noh, hadien ba ki briew jong ka sorkar phareng phah ban pynshisha la kane ka ñiam ka long ka ba shisha ne em da kaba kila thaw da u nar bad ong ïa ki nonglehñiam ban pom la u dkut ne em utei u mar, hynrei ynda la pom ïa uta u mar (nar) ula dkut noh shi syndon bad mih ka snam kumta hi kila ong ba kane ka lehñiam jong ki ka long kaba shisha bad kane ka lehñiam kala neh la shah haduh mynata mynne la ong u pa Dolloi.
Ula ong ruh ba ka lehñiam ha ka shnong Nartiang ka long kaba kyrpang namar ïa ka kjat tidiang jong ka Sati kala hap ha ki bynta jong kane Mandir Durga ha Nartiang haba kiba bun ki riewngeit Hindu wat na kylleng ki jaka ka Ri India ruh ki wan ban mane ha kane ka jaka.
Ka lehñiam mynta ka sngi kala la long kaba ïaid beit ïaid ryntip bad la ïathuh ruh ba ka jingpyndep ïa kane ka lehñiam kan wanrah ïa ka bha ka miat ka roi ka par bad ban lait na ka pang ka shitom, kaba long ruh shi bynta ban pynneh pynsah ïa ka riti ka dustur ba la bun da uba rim ba jah.
Mynta ka sngi ki riewngeit Hindu kiba kynthup lang ïa ki pnar bad ki Dkhar na kylleng ki jaka kila wan ban ainguh ïa ka Blei Durga da kaba rah lang ïa ki jingbam kum ki soh, ka kait bad kiwei kiwei de. Hadien kane la pyndep sa ka pom blang ha phyllaw katei ka Mandir da u Pandit ka Durga Temple, Nartiang.

Leave A Reply

Your email address will not be published.