Bynshet ka PDF ha u Bah Gavin Mylliem kum u Chairman ka Election Committee

Shillong, Risaw 04: Ka Central Executive Committee jong ka seng saiñpyrthei People’s Democratic Front (PDF) ka la bynshet ha u President ka party u Bah Gavin M. Mylliem uba dei ruh u MLA jong ka Sohra Constituency ban lamkhmat kum u Chairman jong ka Central Election Committee ka Party.
Ïa kane ka rai la shim ha ka jingïalang jong ka PDF Central Executive Committee kaba la long ha ka Lah Sngi u Blei kum shi bynta ban pyntyllun noh shakhmat ïa ki kam kiba ïadei bad ka jingpynkhreh na ka bynta ka Elekshon jied nongmihkhmat sha ka Ïingdorbar Thawaiñ ka Jylla ka ban sa long ha u snem 2023.
Ka Party ka la pynkhamti ruh ïa u Secretary jong ka PDF CEC u Bah Auspicious Lyngdoh Mawphlang ban bat ïa ka kam kum u Secretary jong ka Central Election Committee katba u Bah Ivanlumlang Marbañiang, u Bah Emlang Lytan, u Bah Joseph Makdoh bad u Bah James Ban Basaïawmoit kin long kum ki dkhot.
Ha kane ka jingïalang ka PDF CEC ka la thaw ruh ïa ka Central Finance Committee ha kaba la jied ïa u Bah Banteidor Lyngdoh uba dei u MLA jong ka Mawkynrew Constituency bad Myntri ka Sorkar Jylla kum u Chairman, u Bah Aiborlang L Nonglait kum u Secretary nalor u Bah Gavin M Mylliem bad u Bah Auspicious Lyngdoh Mawphlang kum ki dkhot.
“Ka jingthaw ïa ki Committee ka long ban pynkhlaiñ shuh shuh ïa ki rukom treikam jong ka Party ha ka jingpynkhreh ïa ka elekshon ha kaba baroh ki nongkitkam jong ka CEC kin don la ki jong ki bhah treikam kumba la bynshet bad pynkhamti ha ki,” la ong u Bah Gavin.